Real Madrid ជាក្រុមដំបូង​គេ​រក​ចំណូល​បាន១ពាន់​លាន​ដុល្លារ​ក្នុង​មួយ​រដូវ​កាល

ក្លិប Real Madrid ចាត់ទុកជាក្រុមបាល់ទាត់មួយជោគជ័យបំផុតនៅលើពិភពលោក ក្រោយបានឈ្នះពានរង្វាន់ជាច្រើនក្នុងប្រវត្តិសាស្រ្ដបាល់ទាត់។ អ្វីដែលកាន់តែពិសេសគឺផ្នែកហិរញ្ញវត្ថុរបស់ពួកគេមានភាពរឹងមាំខ្លាំង។

Real Madrid បានក្លាយជាក្រុមបាល់ទាត់ដំបូងគេ បានចុះបញ្ជីទទួលបានប្រាក់ចំណូលចំនួន១ពាន់លានដុល្លារ ក្នុងរដូវកាលឆ្នាំ ២០២៣-២៤។ ក្រុមអេស្ប៉ាញមួយនេះបានឈរនៅកំពូលតារាង Deloitte Football Money League ជាក្លិបដែលរកចំណូលបានច្រើនជាងគេលើពិភពលោកជាថ្មីម្តងទៀត។ ក្លិបបានវ៉ាដាច់ក្លិប Manchester City ដើម្បីឡើងមកឈរនៅកំពូលតារាងវិញ។

ការឈ្នះពានរង្វាន់ចំនួន៣ក្នុងរដូវកាលឆ្នាំ២០២៣-២៤ រួមទាំង LaLiga និង Champions League ធ្វើឲ្យមានការកើនឡើងនៃប្រាក់ចំណូលបន្ថែម ស្របពេលការងារជួសជុលនៅកីឡដ្ឋាន Bernabeu បញ្ចប់បាន។

ក្រុមហ៊ុន Deloitte បាននិយាយថា ៖«ប្រាក់ចំណូលប្រចាំថ្ងៃរបស់ Real បានកើនឡើងទ្វេដងដល់២៥៨លានដុល្លារ ក្រោយទទួលបានការឧបត្ថម្ភនៅលើដៃអាវថ្មី និងការកើនឡើងនៃការលក់ទំនិញបានធ្វើឲ្យប្រាក់ចំណូលពាណិជ្ជកម្មមានចំនួន៥០០លានដុល្លារ ការកើនឡើង១៩ភាគរយ»។

ក្រុម Man City ស្ថិតក្នុងចំណាត់ថ្នាក់លេខ២ ក្នុង Money League ជាមួយនឹងប្រាក់ចំណូល៨៧១លានដុល្លារ។ ពូកគេក៏បានបំបែកកំណត់ត្រាប្រាក់ចំណូលផ្ទាល់ខ្លួន ជាក្លិបបាល់ទាត់រកចំណូលបានច្រើនជាងគេក្នុងក្របខ័ណ្ឌ Premier League។

ងាកមកមើលចំណូលរបស់ក្លិបធំផ្សេងៗក៏រកចំណូលបានមិនធម្មតាដែរដូចជាក្រុម Paris St Germain រកចំណូលបាន៨៣៨លានដុល្លារ, Manchester United រកបាន៨០២លានដុល្លារ, Bayern Munich រកបាន៧៩៦លានដុល្លារ ឡើងក្នុងតារាងក្រុមកំពូលទាំង៥រកចំណូលបានច្រើនបំផុត ខណៈក្រុមArsenal រកបាន៧៤៦លានដុល្លារ និងក្រុម Borussia Dortmund ៥៣៤លានដុល្លារ៕

ប្រែសម្រួល៖ ផា រតនា