កីឡា

Neymar ពិភាក្សាជាមួយ Santos ក្នុងការវិលត្រឡប់ទៅលេងនៅប្រេសុីល

បានផុស

២ សប្តាហ៍ មុន

នៅ

ថ្ងៃសុក្រ ២៤ មករា ២០២៥

ដោយ

យោងតាមការចុះផ្សាយរបស់ ESPN ខ្សែប្រយុទ្ធប្រេស៊ីល Neymar កំពុងស្វែងរកដំណោះស្រាយក្នុងការបញ្ចប់កិច្ចសន្យាជាមួយក្លិបអារ៉ាប៊ីសាអ៊ូឌីត Al Hilal ហើយត្រៀមវិលត្រលប់ទៅលេងនៅក្លិប Santos ជំនួសឲ្យការផ្លាស់ប្តូរទៅលីគអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចសន្យារបស់ Neymar ជាមួយក្លិប Al Hilal នឹងបញ្ចប់ក្នុងខែមិថុនា ស្របពេលនេះក្លិប Chicago Fire នៅលីគកំពូលសហរដ្ឋអាមេរិក បានចាប់អារម្មណ៍ចង់បានរូបគេទៅចូលរួមក្រុម។ ខ្សែប្រយុទ្ធប្រេស៊ីលរូបនេះធ្លាប់បាននិយាយកាលពីមុនពីការចង់ទៅលេងនៅលីគកំពូលសហរដ្ឋអាមេរិក (MLS) នៅថ្ងៃណាមួយ ប៉ុន្តែមិនបានបញ្ជាក់នៅពេលណានោះទេ។

គ្រូបង្វឹកក្រុម Al Hilal លោក Jorge Jesus បាននិយាយកាលពីពេលថ្មីៗនេះថា Neymar មិនអាចលេងក្នុងកម្រិតដែលក្រុមធ្លាប់ប្រើបានទៀតទេ ហើយថាខ្សែប្រយុទ្ធនឹងមិនត្រូវបានចុះឈ្មោះដើម្បីលេងនៅ Saudi Pro League សម្រាប់ពាក់កណ្តាលរដូវកាលនេះទេ។

កីឡាករវ័យ៣២ឆ្នាំរូបនេះកំពុងជាសះស្បើយពីរបួសសរសៃពួរកាលពីខែវិច្ឆិកា បន្ទាប់ពីអវត្តមានអស់រយៈពេល១ឆ្នាំ ក្រោយរងរបួសដ ACL នៅជង្គង់ខាងឆ្វេង។ ពេលនេះកីឡាករបានពិភាក្សាជាមួយក្លិប Santos លើកិច្ចព្រមព្រៀងមួយលើលក្ខខណ្ឌខ្ចីជើងរយៈពេល៦ខែ។

នាយកប្រតិបត្តិរបស់ក្លិប Santos លោក Pedro Martins ហាក់ដូចជាបដិសេធទទួលយក Neymar ក្នុងលក្ខខណ្ឌខ្ចីជើងពី Al Hilal។ លោកបាននិយាយថា ៖«ក្លិបកំពុងតាមដានស្ថានភាពរបស់ Neymar ដើម្បីមើលថាតើកីឡាករនឹងដោះស្រាយករណីរបស់គាត់សព្វថ្ងៃរបៀបណា។ កីឡាករមានកិច្ចសន្យាជាមួយក្លិប។ ប្រសិនបើពួកគេដោះស្រាយវានៅទីនោះរួចរាល់ យើងនឹងវាយតម្លៃពីលទ្ធភាពនៃការមកទីនេះបែបណា»៕