កីឡា

ល្ងាចនេះ បឹងកេត ឬ ISI ដង្កោសែនជ័យ ឡើងវគ្គជុំទី៣?

បានផុស

២០ វិនាទី មុន

នៅ

ថ្ងៃសៅរ៍ ៨ កុម្ភៈ ២០២៥

ដោយ

បឹងកេត បើកទ្វារពហុកីឡដ្ឋានជាតិអូឡាំពិក ទទួលក្រុម អាយអេសអាយ ដង្កោសែនជ័យ វេលាម៉ោង៦ល្ងាច ថ្ងៃសៅរ៍នេះដែលជាការប្រកួតសប្តាហ៍ទី១៩ ដ៏សំខាន់ដើម្បីស្វែងរកកៅអី ឡើងទៅជុំទី៣ (៦ក្រុមចុងក្រោយ) ខេមបូឌានព្រីមៀរលីគ២០២៤-២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាជំនួបមួយដែលតឹងតែងបំផុតសម្រាប់ក្រុមទាំងពីរ បន្ទាប់ពីមានការរៀបចំពង្រឹងក្រុមរៀងៗខ្លួននៅជើងទី២។ ISI ដង្កោសែនជ័យ ធ្វើមិនសូវបានល្អទេកាលពីជើងទី១ ដែលធ្វើឲ្យពួកគេស្ទើរតែរបូតឱកាសប្រជែងកៅអី៦ចុងក្រោយ ប៉ុន្តែនៅពេលលោកគ្រូ ទុំ សារ៉ាយ ចូលខ្លួនដឹកនាំបានស្តារឡើងវិញតាមរយៈការប្រើប្រាស់កីឡាករក្មេង។ ប្រមាណ៥ប្រកួតចុងក្រោយ ពួកគេបានចាញ់តែម្តងគត់បានធ្វើឲ្យរកបានពិន្ទុច្រើន និងប្រជែងកៅអីជុំទី៣។

ចំណែក បឹងកេត ក៏ធ្វើមិនបានល្អដែរសម្រាប់ការប្រកួតកាលពីជើងទី១ ដែលជាហេតុធ្វើឲ្យមានការផ្លាស់ប្តូរគ្រូបង្វឹកដែរ។ នៅពេលលោក Conor Nester ចូលខ្លួនមកដឹកនាំក្នុងជើងទី២បាននាំចូលកីឡាករបរទេស៣នាក់ដើម្បីពង្រឹងក្រុម។ ទោះបីជាយ៉ាងណា ការនាំចូលកីឡាករថ្មី និងគ្រូបង្វឹកទើបចាប់ផ្តើមនៅមិនទាន់ល្អប្រសើរច្រើនទេ បើប្រៀបធៀបនឹងជើងទី១។

ឆ្លងកាត់១៨សប្តាហ៍កន្លងទៅ បឹងកេត រកបាន២៧ពិន្ទុ ស្ថិតនៅលេខ៦ ខណៈ ISI ដង្កោសែនជ័យ រកបាន២៤ពិន្ទុ ស្ថិតនៅលេខ៥។ ការប្រកួតល្ងាចនេះ ប្រសិនបើ បឹងកេត ឈ្នះគឺបានឡើងទៅកាន់វគ្គ៦ក្រុមចុងក្រោយ ហើយ ISI ដង្កោសែនជ័យ នឹងអស់ឱកាស។ ផ្ទុយទៅវិញ ប្រសិនបើ ISI ដង្កោសែនជ័យ ឈ្នះ នោះក្រុមទាំងពីរមានពិន្ទុស្មើគ្នា ត្រូវកាត់សេចក្តីប្រកួតសប្តាហ៍ចុងក្រោយ។ កាលពីជើងទី១ ពួកគេស្មើគ្នា ៤-៤។

នៅសប្តាហ៍ទី២០ ជាការប្រកួតចុងក្រោយក្នុងជុំទី២ បឹងកេត ត្រូវប៉ះ វិសាខា នៅថ្ងៃទី១៥ ខែកុម្ភៈ ហើយ ISI ដង្កោសែនជ័យ ត្រូវប៉ះ ភ្នំពេញក្រោន នៅថ្ងៃទី១៦ ខែកុម្ភៈ។

ក្រុមបានឡើងវគ្គ៦ក្រុមចុងក្រោយគឺរកឃើញ៥ក្រុមឡើងវគ្គបន្តគឺ ភ្នំពេញក្រោន (៤៧ពិន្ទុ) ព្រះខ័នរាជស្វាយរៀង (៤៦ពិន្ទុ) វិសាខា (៤១ពិន្ទុ) អង្គរថាយហ្គឺរ (៣៣ពិន្ទុ) និងណាហ្គាវើលដ៍ (៣០ពិន្ទុ)។ ក្រុមធ្លាក់គឺក្រសួងការពារជាតិ ឡាយហ្វព្រះសីហនុ ក្រសួងមហាផ្ទៃ និង គិរីវង់សុខសែនជ័យ។

សម្រាប់ជុំទី៣ ក្រុមកំពូលទាំង៦ត្រូវប្រកួតវិលជុំសន្សំពិន្ទុពីរជើងទៀត ដែលស្មើនឹងក្រុមនីមួយៗត្រូវមាន១០ប្រកួតទៀត ហើយក្រុមធ្លាក់ទាំង៥ក្រុមខាងក្រោមក៏ត្រូវប្រកួតវិលជុំសន្សំពិន្ទុពីរជើងទៀតដែរ៕