កីឡា

ខេត្តស្វាយរៀងជាក្រុមល្អជាងគេ សប្តាហ៍ទី១តេជោលីគ ជុំទី២

បានផុស

៣ សប្តាហ៍ មុន

នៅ

ថ្ងៃចន្ទ ១០ កុម្ភៈ ២០២៥

ដោយ

ក្រុមបាល់ទះស្នងការដ្ឋាននគរបាលខេត្តស្វាយរៀង ធ្វើបានល្អជាងគេ ក្នុងសប្តាហ៍ទី១ ជុំទី២ ពានរង្វាន់តេជោលីគ ឆ្នាំ២០២៥ បន្ទាប់ពីទទួលបានជ័យជម្នះទាំង៣ប្រកួតដោយគ្មានដៃគូណាមួយអាចយកឈ្នះពួកគេសូម្បីមួយសិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រកួតទី១ ក្រុមខេត្តស្វាយរៀង បានយកឈ្នះ ក្រុមបញ្ជាការដ្ឋានអង្គរក្ស ដោយលទ្ធផល ៣-០។ ប្រកួតទី២ ពួកគេបានយកឈ្នះ ក្រុមកងពលធំអន្តរាគមន៍លេខ៣ ដោយលទ្ធផល ៣-០ និង ប្រកួតទី៣ ពួកគេបានយកឈ្នះ វិសាខា ដោយលទ្ធផល ៣-០។

កីឡាករឥណ្ឌា Ashval បានក្លាយជាកីឡាករល្អប្រចាំការប្រកួត៣លើកជាប់គ្នាក្នុងសប្តាហ៍ទី១។ ភាពខ្លាំងរបស់ក្រុមខេត្តស្វាយរៀង ដោយមានអ្នកវាយផ្តាច់ល្អគឺកីឡាករឥណ្ឌាទាំងពីររូប កីឡាករគុយបា Hererra និងកីឡាករម៉ាឡេស៊ី Sim Jian Qin ព្រមទាំងអ្នកប៉ះសេឆ្នើម សួន ចាន់ណារ៉ូ និងលីប៊ើរ៉ូ ឃីម សុវណ្ណដារ៉ា ដែលជាអតីតកីឡាកររបស់វិសាខា។

លទ្ធផលជ័យជម្នះទាំង៣ប្រកួតនេះ ពួកគេរកបាន៩ពិន្ទុពេញ និងធានាបានកៅអីវគ្គ៤ក្រុមចុងក្រោយរួចហើយ បើទោះជានៅសល់២ប្រកួតទៀតក៏ដោយ។

ជាមួយគ្នានេះ ក្រុមក្រសួងមហាផ្ទៃ ក៏ជាក្រុមមិនទាន់ស្គាល់បរាជ័យដែរដោយបានយកឈ្នះទាំង៣ប្រកួត និងរកបាន៩ពិន្ទុពេញ ប៉ុន្តែពួកគេបានចាញ់១សិតនៅពេលពួកគេបានយកឈ្នះ កងពលធំអន្តរាគមន៍លេខ៣ ដោយលទ្ធផល ៣-១ ខណៈ២ប្រកួតទៀតគឺឈ្នះបញ្ជាការដ្ឋានអង្គរក្ស ៣-០ និងឈ្នះ ស្នងការដ្ឋាននគរបាលរាជធានីភ្នំពេញ ៣-០។

រហូតដល់ពេលនេះមាន៣ក្រុមហើយបានធានាកៅអីវគ្គ៤ក្រុមចុងក្រោយគឺ ក្រុមខេត្តស្វាយរៀង ក្រសួងមហាផ្ទៃ និងស្នងការដ្ឋាននគរបាលរាជធានីភ្នំពេញ បើទោះជាការប្រកួតនៅសល់២ប្រកួតទៀតក្នុងជុំទី២។

ក្រុមបបញ្ជាការដ្ឋានអង្គរក្ស វិសាខា និងកងពលធំអន្តរាគមន៍លេខ៣ នឹងមាន១ត្រូវឡើងទៅវគ្គ៤ក្រុមចុងក្រោយ ហើយមាន២ត្រូវធ្លាក់។ ក្រុមវិសាខា និងកងពលធំអន្តរាគមន៍លេខ៣ប្រឈមនឹងធ្លាក់ត្រឹមជុំទី២ បន្ទាប់ពីពួកគេបានចាញ់ទាំង៣ប្រកួត និងមិនទាន់ពិន្ទុសោះ។

តារាងពិន្ទុ សប្តាហ៍ទី១ ជុំទី២