កីឡា

កីឡាការិនីជប៉ុន Miki រីករាយនៅកម្ពុជារហូតចាត់ទុកប្រទេសដ៏ល្អ

បានផុស

២ ខែ មុន

នៅ

ថ្ងៃចន្ទ ១០ កុម្ភៈ ២០២៥

ដោយ

កីឡាការិនីសញ្ជាតិជប៉ុន Miki Ichikawa ខ្សែបម្រើកណ្តាលដ៏ឆ្នើមរបស់ក្រុមបាល់ទាត់នារីភ្នំពេញក្រោន បានកំពុងរីករាយនឹងអាជីពបាល់ទាត់របស់ខ្លួននៅកម្ពុជាដែលនាងបានចាត់ទុកជាប្រទេសដ៏ល្អ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានកម្ពុជាថ្មីបានសម្ភាស Miki ដោយមានខ្លឹមសារដូចខាងក្រោម៖

សំណួរ៖ តើ Miki មានអារម្មណ៍យ៉ាងណាដែរសម្រាប់ការលេងបាល់ទាត់នៅកម្ពុជាមួយរដូវកាលនេះ?

Miki៖ ការប្រកួតបាល់ទាត់នៅកម្ពុជានៅមានកម្រិតទាបជាងនៅជប៉ុន ប៉ុន្តែស្មារតីក្រុមក្នុងការលេងខ្ពស់ ពេលខ្លះប្រហែលជាខ្លាំងជាងនៅជប៉ុនផង។ ខ្ញុំមកលេងនៅកម្ពុជា ចង់ឲ្យបាល់ទាត់នារីនៅកម្ពុជារីកចម្រើន។ ម្យ៉ាងទៀត ខ្ញុំមានទំនាក់ទំនងល្អជាមួយក្រុមនៅកម្ពុជាទើបបានជាខ្ញុំមកលេងនៅកម្ពុជាដើម្បីឲ្យបាល់ទាត់នារីនៅកម្ពុជាកាន់តែល្អប្រសើរ។

សំណួរ៖ តើការស្នាក់នៅលេងបាល់ទាត់នៅកម្ពុជាជួបការលំបាកខ្លះទេ?

Miki៖ ពេលខ្ញុំមកកម្ពុជាលើកដំបូង គឺខ្ញុំជួបការលំបាកដែរ តែបន្ទាប់មក ខ្ញុំក៏មានអារម្មណ៍រីករាយនឹងស្ថានភាពរស់នៅក្នុងប្រទេសកម្ពុជា។ ពេលស្គាល់មិត្តរួមក្រុម ស្គាល់ក្រុមការងារ ខ្ញុំក៏រីករាយកាន់តែខ្លាំង។ ខ្ញុំពិតជារីករាយក្នុងការស្នាក់នៅប្រទេសកម្ពុជា។ ប្រជាជននៅទីនេះពិតជារួសរាយណាស់។ ជាពិសេសមិត្តរួមក្រុមភ្នំពេញក្រោន ប្រៀបដូចជាក្រុមគ្រួសាររបស់ខ្ញុំ។ ដូច្នេះបានជាខ្ញុំរីករាយនៅទីនេះ។

សំណួរ៖ តើ Miki មានគំនិតអ្វីដែលចង់ឲ្យបាល់ទាត់នារីកម្ពុជារីកចម្រើន?

Miki៖ ដើម្បីឲ្យបាល់ទាត់នារីកម្ពុជាខ្លាំង គឺខ្ញុំចង់ឃើញមានកម្មវិធីប្រកួតច្រើនសម្រាប់កីឡាការិនីបង្ហាញសមត្ថភាព។ មិនត្រឹមតែមានការប្រកួតប្រជែងកាន់តែខ្លាំងនៅក្នុងលីគប៉ុណ្ណោះទេ ប៉ុន្តែត្រូវមានកម្មវិធីផ្សេងៗទៀត។ ខ្ញុំចង់ឃើញអ្នកគាំទ្រកម្ពុជាកាន់តែច្រើនចូលរួមគាំទ្រ និងលើកទឹកចិត្តដល់ការប្រកួតបាល់ទាត់នារី។

សំណួរ៖ តើ Miki ចង់ឃើញកីឡាការិនីជប៉ុនផ្សេងទៀតមកលេងនៅកម្ពុជាទេ?

Miki ៖ ខ្ញុំចង់ឃើញកីឡាការិនីជប៉ុនមកលេងនៅកម្ពុជាច្រើននាក់ទៀត។ ខ្លួនខ្ញុំផ្ទាល់នឹងព្យាយាមជួយដល់ក្រុម និងបាល់ទាត់នារីកម្ពុជាឲ្យទទួលបានការចាប់អារម្មណ៍ខ្លាំងពីអ្នកគាំទ្រ។

សំណួរ៖ តើ Miki ចូលចិត្តញាំម្ហូបខ្មែរទេ?

Miki ៖ ខ្ញុំបានព្យាយាមញាំម្ហូបខ្មែរច្រើនដែរ តែខ្ញុំនៅតែមិនអាចញាំបានច្រើន ពីព្រោះទម្លាប់ញាំអាហារជប៉ុនទៅហើយ។ ជាទូទៅខ្ញុំធ្វើម្ហូបខ្លួនឯង តែខ្ញុំមិនពូកែធ្វើម្ហូបទេ ហើយពេលខ្លះចេញទៅញាំនៅខាងក្រៅដែរ។

សំណួរ៖ នៅពេលជួបក្រុមគ្រួសារ មិត្តភក្តិ ឬប្រជាជនជប៉ុន តើ Miki និយាយអ្វីពីកម្ពុជាឲ្យពួកគាត់បានដឹង?

Miki ៖ ទី១ កម្ពុជាជាកន្លែងមានសុវត្ថិភាព។ មុនពេលខ្ញុំមកទីនេះ ខ្ញុំឮគេនិយាយពីរឿងមិនសូវល្អនៅកម្ពុជា ទីកន្លែងមួយចំនួនគ្មានសុវត្ថិភាព ប៉ុន្តែការពិតមិនដូចគេនិយាយទេ។ កម្ពុជាជាប្រទេសកំពុងអភិវឌ្ឍ ហើយប្រជាជនកម្ពុជាពិតខិតខំប្រឹងប្រែងខ្លាំងណាស់ដើម្បីអភិវឌ្ឍប្រទេសជាតិ។ ខ្ញុំពិតជាចូលចិត្តប្រជាជនកម្ពុជាដែលកំពុងខិតខំប្រឹងប្រែងយ៉ាងខ្លាំង។ ទាំងនេះហើយជាអ្វីដែលខ្ញុំចង់ប្រាប់ក្រុមគ្រួសារ និងមិត្តភក្តិរបស់ខ្ញុំឲ្យមកលេងកម្ពុជា។ ប្រជាជនចិត្តល្អ រួសរាយរាក់ទាក់ ខិតខំប្រឹងប្រែងធ្វើការ និយាយឲ្យចំគឺជាប្រទេសដ៏ល្អ។

ជាចុងក្រោយ ខ្ញុំចង់ប្រាប់ថា ខ្ញុំពិតជាសប្បាយរីករាយដែលបានជួយក្រុមនារីភ្នំពេញក្រោនឈ្នះជើងឯកលីគនារីកម្ពុជា។ ខ្ញុំចូលចិត្តក្លិបភ្នំពេញក្រោន ហើយអរគុណអ្នកគាំទ្រដែលបានគាំទ្រលើកទឹកចិត្តកន្លងមក។ យើងនឹងខិតខំប្រឹងប្រែងបន្ថែមទៀតនៅពេលខាងមុខ សូមបន្តគាំទ្រក្រុមយើងទៀត។

កីឡាការិនី Miki Ichikawa បានចូលរួមជាមួយក្រុមនារីភ្នំពេញក្រោន កាលពីខែសីហា ឆ្នាំ២០២៤ និងបានជួយក្រុមឈ្នះជើងឯកលីគបាល់ទាត់នារីកម្ពុជារដូវកាល២០២៤-២៥៕