កីឡា

លោក កែវ សារ៉េត ៖«គ្មានព័ត៌មានអ្វីពី FIFA ឬ AFC រឿងកម្ពុជាជំនួសប៉ាគីស្ថាន»

បានផុស

១៩ វិនាទី មុន

នៅ

ថ្ងៃសុក្រ ១៤ កុម្ភៈ ២០២៥

ដោយ

បន្ទាប់ពីក្រុមបាល់ទាត់ជម្រើសជាតិ ប៉ាគីស្ថាន បានសម្រេចដកខ្លួនចេញពីការប្រកួតជម្រុះក្នុងពូលពានរង្វាន់ AFC Asian Cup ឆ្នាំ២០២៧ អ្នកគាំទ្រពិតជាចង់ឲ្យក្រុមបាល់ទាត់ជម្រើសជាតិចូលជំនួស ប៉ុន្តែរហូតដល់ពេលនេះតំណាងសហព័ន្ធកីឡាបាល់ទាត់កម្ពុជាបានបញ្ជាក់ថា គ្មានព័ត៌មានអ្វីពីសហព័ន្ធកីឡាបាល់ទាត់អន្តរជាតិ ឬសហព័ន្ធកីឡាបាល់ទាត់អាស៊ីឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជាបានឆ្លើយតបនឹងសារព័ត៌មាន«កម្ពុជាថ្មី»តាមរយៈសារអេឡិចត្រូនិកថា ៖«យើងក៏ចង់ឲ្យជម្រើសជាតិបានលេងដូចអ្នកគាំទ្រដែរ ប៉ុន្តែអ្វីដែលជាការសម្រេចគឺស្ថិតនៅលើ AFC។ យើងរង់ចាំស្តាប់គេដែរ ប៉ុន្តែអត់មានដំណឹងពីខាងគេមកផង។ បើមានព័ត៌មានអ្វី ចាំខ្ញុំចែករំលែកជូន»។

កាលពីសប្តាហ៍មុន សហព័ន្ធកីឡាបាល់ទាត់អន្តរជាតិ (FIFA) បានពិន័យព្យួរសកម្មភាពបាល់ទាត់របស់សហព័ន្ធកីឡាបាល់ទាត់ប៉ាគីស្ថាន (PFF) ដោយមានប្រសិទ្ធភាពភ្លាមៗ ដោយសារពួកគេបានបរាជ័យក្នុងការកែប្រែធម្មនុញ្ញរបស់ខ្លួនដើម្បីធានាបាននូវការបោះឆ្នោតប្រកបដោយយុត្តិធម៌ និងប្រជាធិបតេយ្យ សម្រាប់ការបំពេញកាតព្វកិច្ចរបស់ខ្លួនដែលបានកំណត់ដោយ FIFA និង AFC។

បន្ទាប់ពីមក សហព័ន្ធកីឡាបាល់ទាត់អាស៊ី (AFC) បានកំណត់ពេលត្រឹមថ្ងៃទី៤ ខែមីនា ឆ្នាំ២០២៥ ដើម្បីឲ្យសហព័ន្ធកីឡាបាល់ទាត់ប៉ាគីស្ថាន រៀបចំមហាសន្និបាត ដើម្បីអនុម័តលើវិសោធកម្មនៃធម្មនុញ្ញរបស់ខ្លួនស្របតាមការបង្ហាញរបស់សហព័ន្ធកីឡាបាល់ទាត់អន្តរជាតិ និងសហព័ន្ធកីឡាបាល់ទាត់អាស៊ី។

ទោះបីជាយ៉ាងណា នៅថ្ងៃទី១០ ខែកុម្ភៈ ឆ្នាំ២០២៥ តាមរយៈផេក FootbalPakistaan.Comបានប្រកាសថា សហព័ន្ធកីឡាបាល់ទាត់ប៉ាគីស្ថានបានសម្រេចដកខ្លួនចេញពីការប្រកួតជម្រុះក្នុងពូលពានរង្វាន់ 2027 AFC Asian Cup។

ប៉ាគីស្ថាននៅ ពូល E ពានរង្វាន់ 2027 AFC Asian Cup ជាមួយ ស៊ីរី អាហ្វហ្គានីស្ថាន និង មីយ៉ាន់ម៉ា។ ប្រសិនបើសហព័ន្ធកីឡាបាល់ទាត់អាស៊ីត្រូវដាក់ជំនួសមានតែ ក្រុមបាល់ទាត់ជម្រើសជាតិកម្ពុជា ប៉ុណ្ណោះ ពីព្រោះ ប៉ាគីស្ថាន បានប្រកួតជម្រុះបឋម ជាមួយ កម្ពុជា។ លទ្ធផលវគ្គជម្រុះបឋមនោះ ជើងទី១ កម្ពុជា បានត្រឹមស្មើ ប៉ាគីស្ថាន ០-០ នៅពហុកីឡដ្ឋានជាតិអូឡាំពិក ប៉ុន្តែនៅជើងទី២ កម្ពុជា បានចាញ់ ប៉ាគីស្ថាន ដោយលទ្ធផល ១-០ នៅប្រទេសប៉ាគីស្ថាន៕

អត្ថបទ៖ វីរបុត្រ