ចូល​វ័យ​៥៩​ឆ្នាំ ខ្សែប្រយុទ្ធជប៉ុន Miura ត្រៀម​លេង​​រដូវកាលទី៤០

ខ្សែប្រយុទ្ធជប៉ុន Kazuyoshi Miura បានឈានចូលវ័យ ៥៨ឆ្នាំ នៅថ្ងៃពុធ ទី២៦ ខែកុម្ភៈ ប៉ុន្តែអ្វីដែលអស្ចារ្យ លោក​គ្រោងនឹងចាប់ផ្តើមរដូវកាលទី៤០ ក្នុងបាល់ទាត់អាជីព។

លោក Miura លេងឱ្យក្រុមនៅលីគទី៤​របស់​ជប៉ុន Suzuka ក្នុងលក្ខខណ្ឌខ្ចីជើងពីក្លិប Yokohama នៃលីគទី២។ សម្រាប់ក្លិប Suzuka ក៏គ្រោងនឹងចាប់ផ្តើមហ្វឹកហាត់នៅសប្តាហ៍នេះ​ត្រៀមបើកនៅខែក្រោយ។

«ការចូលនិវត្តន៍មិនមែនជាជម្រើសទេ។ ខ្ញុំចង់លេងឱ្យបានច្រើននាទីតាមដែលខ្ញុំអាចធ្វើបាននៅក្នុង​កីឡា​បាល់ទាត់»។ លោក Miura បាននិយាយកាលពីចុងឆ្នាំមុនក្នុងសន្និសីទសារព័ត៌មានមួយ ដែលដកស្រង់ដោយទីភ្នាក់ងារសារព័ត៌មានជប៉ុន Kyodo។

លោក Miura ធ្លាប់ប្រកបអាជីពនៅលីគនៃប្រទេសប្រេស៊ីល អ៊ីតាលី ក្រូអាត អូស្ត្រាលី និងព័រទុយហ្គាល់។ លោកបានបង្ហាញខ្លួនជាលើកដំបូងនៅឆ្នាំ១៩៨៦ ជាមួយក្លិប Santos លីគកំពូលប្រេស៊ីល ដែលជាក្លិប​ដែលល្បីល្បាញដោយតារាប្រេស៊ីល Pelé ។

នៅឆ្នាំ២០១៧ ពេលមានវ័យ ៥០ឆ្នាំ លោកបានក្លាយជាកីឡាករចំណាស់ជាងគេបំផុតដែលអាចរកគ្រាប់បាល់បានក្នុងការប្រកួតអាជីព។ នោះបានឈរលើកំពូលតារាងដែលកាន់ដោយកីឡាករជម្រើសជាតិអង់គ្លេស Stanley Matthews ដែលមានវ័យ ៥០ឆ្នាំដូចគ្នា និងនៅអាចរកគ្រាប់បាល់បាន។

លោក Miura មានឈ្មោះល្បីល្បាញដំបូងគេនៅក្នុងបាល់ទាត់ជប៉ុន។ លោកស៊ុតបញ្ចូលទីបាន ៥៥គ្រាប់ក្នុងការបង្ហាញខ្លួន ៨៩លើក និងជាតារាឆ្នើមជាមួយក្រុមជម្រើសជាតិជប៉ុន ក្នុងទសវត្សរ៍ឆ្នាំ១៩៩០៕

ប្រែសម្រួល៖ មន្នីរ័ត្ន
ប្រភព៖ AP