នៅ​តែល្អ! Neymar ស៊ុតហ្វ្រីឃីគយ៉ាងអស្ចារ្យ ជួយឱ្យ Santos ឈ្នះ Bragantino (វីដេអូ)

នាព្រឹកថ្ងៃទី៣ ខែមីនា​នេះ ក្រុម Santos បានបើកទ្វារកីឡដ្ឋាន Estadio Urbano Caldeira ទទួលស្វាគមន៍ក្រុមភ្ញៀវ Bragantino នៅក្នុងការប្រកួតវគ្គ ៨ ក្រុមចុងក្រោយ​ពានរង្វាន់ Paulista A1 របស់ប្រេស៊ីល។

ជាការពិតណាស់ នៅក្នុងការប្រកួត​នេះ​ ក្រុមម្ចាស់ផ្ទះ Santos ពិតជាធ្វើបានល្អមែនទែន ដោយបញ្ចប់ការប្រកួត ៩០ នាទីពេញ ពួកគេបានយកឈ្នះលើក្រុមភ្ញៀវ Bragantino ក្នុងលទ្ធផល ២-០។

ក្នុងនោះគ្រាប់ទី១​រកបានដោយប្រធានក្រុម Neymar នៅនាទីទី៩ តាមរយៈការស៊ុតហ្វ្រីឃីគ និង​១​គ្រាប់ទៀត​រកបានដោយកីឡាករ Joao Schmidt នៅនាទីទី ៥៦។

គួរបញ្ជាក់ថា ក្រោយជ័យជម្នះនេះ Santos បានកក់កៅអីឡើងទៅកាន់វគ្គពាក់កណ្តាលផ្តាច់ព្រ័ត្រ ពាន Paulista A1។ ដោយឡែកក្រុម​២​ផ្សេងទៀត រួមមាន Palmeiras និង Corinthians ក៏បានកក់កៅអីរួចរាល់ផងដែរ។ លើកលែងតែក្រុម Sao Paulo និង Novorizontino ត្រូវប្រកួតតទល់គ្នានៅថ្ងៃពុធទី៤ ស្អែក។

អ្វី​ដែល​គួរ​ឲ្យ​ចាប់​អារម្មណ៍​បំផុត​ខ្សែ​ប្រយុទ្ធ Neymar ដែល​ទើប​ជា​សះ​ស្បើយ​ពី​របួស និង​បាន​វិល​ត្រឡប់​ទៅ​ក្លិប​ចាស់​នៅ​ប្រទេស​ប្រេស៊ីល​វិញ ស៊ុត​បាល់ហ្វ្រីឃីគ​បាន​យ៉ាង​ល្អ​គួរ​ឲ្យ​ចាប់​អារម្មណ៍៕

ប្រែ​សម្រួល៖ សេម កុសល