Benzema ទម្លាយមូលហេតុនៃការជ្រើសរើសទៅលេងនៅ អារ៉ាប៊ីសាអ៊ូឌីត

អតីតខ្សែប្រយុទ្ធ Real Madrid កីឡាករ Karim Benzema បានបង្ហើបពីហេតុផលចម្បងមួយនៅពីក្រោយការសម្រេចចិត្តចាកចេញពីរាជធានី អេស្ប៉ាញ ផ្លាស់ទៅកាន់ក្លិប Al-Ittihad របស់ អារ៉ាប៊ីសាអ៊ូឌីត ប៉ុន្តែមិនមែនដោយសាររឿងលុយឡើយ។

ជាការពិតណាស់ នាមួយរយៈចុងក្រោយនេះ មានកីឡាករឆ្នើមៗពីអឺរ៉ុប​ជា​ច្រើន​ បានសម្រេចចិត្តផ្លាស់ទៅលេងនៅលីគ Saudi Pro League តែអ្វីដែលគួរឱ្យកត់សម្គាល់ អ្នកគាំទ្រភាគច្រើនតែងតែគិតថា ពួក​គេ​សម្រេចចិត្តផ្លាស់ទៅទីនោះ​ គឺដោយសារលុយមួយមុខគត់ ពី​ព្រោះទីនោះពិតជាទទួលបានប្រាក់ពលកម្មច្រើនពិតមែន។

ទោះបីជាយ៉ាងណា Benzema ដែលជាកីឡាករកំពុងលេងនៅទីនោះមួយរូប បានចេញមុខទម្លាយមូលហេតុពិត ថាដោយសារខ្លួនមិនចង់លេងជួបក្លិបចាស់ Real Madrid ទើបជ្រើសរើសការផ្លាស់ទៅទឹកដីមជ្ឍឹមបូព៌ា។

ដកស្រង់ពាក្យសម្តីដើមពីអ្នកកាសែត អ៉ីតាលី លោក Fabrizio Romano អតីតខ្សែប្រយុទ្ធជម្រើសជាតិ បារាំង បានលើកឡើងយ៉ាងដូច្នេះថា ៖«ការសម្រេចចិត្តរបស់ខ្ញុំផ្លាស់ទៅ អារ៉ាប៊ីសាអ៊ូឌីត ដោយសារខ្ញុំមិនចង់លេងតទល់នឹង Real Madrid នៅក្នុងជីវិតខ្ញុំ»។

គួរបញ្ជាក់ថា Benzema គឺជាកីឡាករដ៏សំខាន់មួយរូបរបស់ក្រុមអធិរាជស អំឡុងពេលលេងទីនោះពីឆ្នាំ ២០០៩ ដល់ឆ្នាំ ២០២៣ មុនពេលចាកចេញទៅកាន់ Al-Ittihad៕

ប្រែ​សម្រួល៖ សេម កុសល