កីឡា

កីឡាករ រិទ្ធ អារុណ ប្រហែលមិនទៅជប៉ុនវិញទេ ក្រោយនៅទីនោះ១០ឆ្នាំឃ្លាតឆ្ងាយពីប្រពន្ធ

បានផុស

២ នាទីutes មុន

នៅ

ថ្ងៃពុធ ៥ មីនា ២០២៥

ដោយ

កីឡាករ រិទ្ធ អារុណ ថាខ្លួនប្រហែលជាមិនវិលត្រឡប់ទៅបង្ហាត់គុនខ្មែរនៅឯប្រទេសជប៉ុនបន្តទៀតទេ ព្រោះចង់ផ្ដល់ភាពកក់ក្ដៅដល់គ្រួសារក្រោយបែកគ្នាអស់ប្រហែល ១០ឆ្នាំមកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ រិទ្ធ អារុណ

អ្នកប្រដាល់សេរីចាស់ រិទ្ធ អារុណ បានឲ្យដឹងកាលថ្មីៗនេះថា ការបន្តអាជីពទៅបង្ហាត់គុនខ្មែរនៅឯប្រទេសជប៉ុនវិញនោះប្រហែលជាមិនទៅទៀតនោះទេ។ ដោយសារតែអាណិតប្រពន្ធកូនផង និងចង់បំពេញបំណងប្រពន្ធដែលចង់ឲ្យខ្លួននៅស្រុកខ្មែរជាមួយគ្រួសារ មើលថែចំការផង និងឡើងប្រកួតខ្លះៗនៅកម្ពុជាទៅបានហើយ។

រិទ្ធ អារុណ និងគ្រួសារ

ជើងខ្លាំងដើមកំណើតពីខេត្តសៀមរាបខាងលើបន្ថែមទៀតថា ការបំពេញការងារជាគ្រូបង្ហាត់ប្រដាល់នៅជប៉ុនអស់រយៈពេលខ្ទង់ ១០ឆ្នាំមកហើយ និងបានមកលេងស្រុកខ្មែរតែ៣ដងប៉ុណ្ណោះ។ ប្រសិនបើលោកចង់បន្តការងារនៅទីនោះគឺអាចទៅបានជាធម្មតា ប៉ុន្តែដូចជម្រាបជូនខាងលើអីចឹង ស្រណោះពាក្យប្រពន្ធថា «បែកគ្នាអស់១០ឆ្នាំហើយ តើមាន ១០ឆ្នាំប៉ុន្មានដងទៀតក្នុងជីវិតនេះ» ។ មួយទៀតអាណិតប្រពន្ធ និងកូនផងដែលរស់នៅខ្វះភាពកក់ក្ដៅពីប្ដី។

កីឡាករ រិទ្ធ អារុណ លើកម្រាម ១០ និយាយទៅកាន់អ្នកស្រឡាញ់គុនខ្មែរទាំងអស់សូមជួយគាំទ្រការប្រកួតរបស់ខ្លួននៅពេលនេះផង។ រូបគេនឹងខំប្រឹងប្រែងប្រកួតឲ្យបានល្អជូនអ្នកទស្សនា និងសុំការអភ័យទោសប្រសិនបើនៅខ្វះខាតចំណុចណាមួយហើយសន្យាថានឹងកែប្រែឲ្យកាន់តែប្រសើរតាមការរិះគន់បែបស្ថាបនារបស់អ្នកគាំទ្រគុនខ្មែរ។

រំលឹកដែរថា រិទ្ធ អារុណ ជាអ្នកប្រដាល់ចាស់វស្សា និងជាសិស្សប្អូនលោក ធន់ សុភា ផងដែរដែលបានហ្វឹកហាត់រួមគ្នាជាមួយលោកគ្រូតា ឈិត សារឹម នៅសមាគមប្រដាល់កងយោធពលខេមរភូមិន្ទ។ រូបគេចាក់ចេញទៅប្រទេសជប៉ុនដើម្បីបង្ហាត់ផ្សព្វផ្សាយគុនខ្មែរតាំងពីឆ្នាំ២០១៦ មកម្ល៉េះ។ ឥលូវនេះបានវិលត្រឡប់មកកម្ពុជាវិញហើយ និងបានឡើងប្រកួតបាន ១ប្រកួតផងដែរនៅសង្វៀនទទក កាលពីថ្ងៃទី១៥ ខែកុម្ភៈ ឆ្នាំ២០២៥ កន្លងទៅនេះ៕