មិន​ស្រួល​ទេ! មុនប៉ះ At Madrid យប់នេះ ខ្សែប្រយុទ្ធឆ្នើមរបស់ R.Madrid ម្នាក់ បានរបួស

ក្លិបអធិរាជស Real Madrid អាចនឹងត្រូវអវត្តមានខ្សែប្រយុទ្ធឆ្នើម Kylian Mbappe សម្រាប់ការប្រកួតជើងទី ២ វគ្គ ១៦ ក្រុមចុងក្រោយនៃពានរង្វាន់ Champions League ទល់នឹងក្រុម Atletico Madrid នៅយប់រំលង​អាធ្រាត្រឈានចូលថ្ងៃ ព្រហស្បតិ៍ ទី ១៣ ខែ​មីនា​ បន្ទាប់ពីរូបគេ ត្រូវបានគេពិនិត្យឃើញមានភាពមិនស្រួលនៅត្រង់សាច់ដុំ។

យោងតាមការចុះផ្សាយដោយអ្នកកាសែតលោក Carlos Rodriguez បានឱ្យដឹងថា ខ្សែប្រយុទ្ធសញ្ជាតិ បារាំង វ័យ ២៦ ឆ្នាំកំពុងទទួលការព្យាបាលសាច់ដុំ។ កាលពីថ្ងៃ អង្គារ៍ ម្សិលមិញ រូបគេមិនបានចូលរួមហ្វឹកហាត់ជាមួយក្រុមទេ។ ប្រភពដដែលបានបញ្ជាក់ថា Mbappe ត្រូវបានគេដាក់ឱ្យហ្វឹកហាត់ដាច់ដោយឡែកម្នាក់ឯង ហើយគេរំពឹងថា គាត់ទំនងមិនអាចចូលលេងទាន់ពេលសម្រាប់ការប្រកួតយប់នេះឡើយ។

សូមរម្លឹកថា កាលពីជំនួបជើងទី ១ សប្តាហ៍មុន Mbappe បានចូលលេងពេញ ៩០ នាទីតែម្តង ហើយរូបគេ ក៏បានដើរតួយ៉ាងសំខាន់ ក្នុងការជួយឱ្យ Real Madrid យកឈ្នះលើ At Madrid ដោយ​​លទ្ធផល ២ ទល់នឹង ១ ផងដែរ៕

ប្រែសម្រួលអត្ថបទ៖ សេម កុសល
ប្រភព៖ Sportskeeda