គ្រូ Shan United ចង់បិទ ព្រះខ័នរាជស្វាយរៀង សូន្យ ល្ងាច​នេះ

គ្រូបង្វឹករបស់ក្លិបមីយ៉ាន់ម៉ា Shan United លោក Hiroki Ono បានបង្ហាញក្តីជឿជាក់ខ្ពស់ ដោយដាក់ផែនការ​បិទក្រុមតំណាង​កម្ពុជា​ ព្រះខ័នរាជស្វាយរៀង មិនឱ្យមានគ្រាប់បាល់សូម្បីមួយគ្រាប់ នៅក្នុងការប្រកួតជើងទី ២ វគ្គ ៨ ក្រុមចុងក្រោយពាន AFC Challenge League វេលា​ម៉ោង​៥:៣០​នាទី​ល្ងាចនេះ។

ក្រុម ព្រះខ័នរាជស្វាយរៀង កំពុងមានក្តីរំពឹងខ្ពស់ ថា នឹងអាចឡើងទៅកាន់វគ្គពាក់កណ្តាលផ្តាច់ព្រ័ត្រពាន AFC Challenge League បន្ទាប់ពីការប្រកួតជើងទី ១ ទទួល​បាន​ជ័យជម្នះ​លើក្រុម Shan United កាលពីសប្តាហ៍មុន នៅពហុកីឡដ្ឋានជាតិមរតកតេជោក្នុងលទ្ធផលយ៉ាងចាស់ដៃ ៦-២។

ទោះបីជាយ៉ាងណា លទ្ធផលសម្រេចផ្លូវការ គឺនឹងត្រូវរង់ចាំការប្រកួតជើងទី ២ ល្ងាចនេះ ដែលធ្វើឡើងនៅប្រទេស មីយ៉ាន់ម៉ា។ ដូច្នេះប្រសិន​បើ Shan United ចង់ទម្លាក់ក្រុមភ្ញៀវ ព្រះខ័នរាជស្វាយរៀង​ លុះត្រាតែពួកគេអាចទទួលជ័យជម្នះក្នុងលទ្ធផលចាប់ពី ៥-០ ឡើងទៅ។

ថ្លែងនៅក្នុងសន្និសីទកាសែតកាលពីល្ងាចថ្ងៃពុធ ទី ១២ ម្សិលមិញ លោក Hiroki Ono បានមានប្រសាសន៍យ៉ាងដូច្នេះថា ៖«សូមបំភ្លេចលទ្ធផលកាលពីជើងទី ១ ចោលទៅ ហើយវាដល់ពេល ដើម្បីរៀបចំការប្រកួតបន្ទាប់។ គោលដៅមេរបស់យើង គឺយើងចង់បិទ (ព្រះខ័នរាជស្វាយរៀង) មិនឱ្យមានគ្រាប់បាល់នៅក្នុងផ្ទះ។ កីឡាករបានប្រឹងប្រែងហ្វឹកហាត់ខ្លាំងណាស់។ ខ្ញុំមិនចង់ចាញ់នៅក្នុងដីខ្លួនឯងទេ»៕

អត្ថបទ៖ សេម កុសល