កីឡា

ពានរង្វាន់ហែលទឹកព្រឹទ្ធាចារ្យ ហែម ថុន ធ្វើឲ្យក្មេងៗទទួលបានបទពិសោធដល់កម្រិតខ្ពស់

បានផុស

២០ នាទីutes មុន

នៅ

ថ្ងៃចន្ទ ១៧ មីនា ២០២៥

ដោយ

អគ្គលេខាធិការសហព័ន្ធខ្មែរកីឡាហែលទឹក ចាត់ទុកការប្រកួតកីឡាហែលទឹក និងហែលទឹកពាក់ជេីងទា ពានរង្វាន់ព្រឹទ្ធាចារ្យ ហែម ថុន ឆ្នាំ២០២៥ ផ្ដល់បទពិសោធល្អ ចំណេះដឹង នៃការប្រកួតដើម្បីឈានទៅរកការហ្វឹកហាត់ និងប្រកួតកម្រិតខ្ពស់នៅថ្ងៃខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបភាពលើផេកសហព័ន្ធ

លោក ហែម គីរី អគ្គលេខាធិការសហព័ន្ធខ្មែរកីឡាហែលទឹកបានឲ្យដឹងថា ការប្រកួតលើកទី៧ នេះទទួលបានជោគជ័យ និងរលូនល្អ។ ឆ្នាំនេះមានការចូលរួមច្រើនក្នុងនោះមានក្លឹប សមាគម សាលាអន្តរជាតិឯកជន ឡើងរហូតដល់ ៣៥ ខណៈកន្លងទៅច្រើនបំផុតខ្ទង់ ១០ ប៉ុណ្ណោះ។ ជាមួយគ្នានេះដែរនៅមានស្ថាប័ន សាលាឯកជនមួយចំនួនទៀតមិនបានទទួលដំណឹងពីព័ត៌មានប្រកួតនោះឡើយ ស្របពេលសហព័ន្ធបានប្រកាសរយៈប្រហែលមួយខែ។ សហព័ន្ធនឹងព្យាយាមធ្វើការផ្សព្វផ្សាយឲ្យកាន់តែទូលំទូលាយជាងនេះបន្ថែមទៀតសម្រាប់ព្រឹត្តិការណ៍ប្រកួតក្រោយៗទៀត។

រូបភាពលើផេកសហព័ន្ធ

អគ្គលេខាធិការខាងលើបន្ថែមទៀតថា នេះជាមោទកភាព និងភាពរីកចម្រើនមួយគួរឲ្យកត់សម្គាល់ ព្រោះមានយុវជនចូលរួមច្រើនក្នុងឆ្នាំនេះរហូតខ្ទង់ជាង ២០០នាក់។ តាមលក្ខណៈបច្ចេកទេសមើលឃើញថា យុវជនអាយុ ៧ឆ្នាំឡើងចូលរួមបានទទួលចំណេះដឹង របៀបរបប នៃការប្រកួត បទពិសោធជាក់ស្ដែងផ្សេងៗពីការតៀមខ្លួននានាដែលទាំងនេះហើយធ្វើឲ្យពួកគេឈានទៅរកការហ្វឹកហាត់ ឬប្រកួតកម្រិតខ្ពស់នៅថ្ងៃខាងមុខបន្តទៀត។

រូបភាពលើផេកសហព័ន្ធ

លោក ហែម គីរី លើកឡើងពីបញ្ហាប្រឈមមួយចំនួនផងដែរដូចជាខ្វះការឧបត្ថម្ភគាំទ្របន្ថែម ព្រោះការចំណាយរៀបចំព្រឹត្តិការណ៍នេះបានមកពីប្រធានសហព័ន្ធ និងអនុប្រធានសហព័ន្ធនោះទេ ស្របពេលមានក្រុមហ៊ុនមួយចំនួនបានជួយដែរតែក្នុងចំនួនតិចតួចមិនអាចរ៉ាប់រងគ្រប់បង្កើតឲ្យមានជាការប្រកួតបែបនេះឡើយ។

រូបភាពលើផេកសហព័ន្ធ

ស្របតាមគោលនយោបាយរបស់រាជរដ្ឋាភិបាលជំរុញ និងលើកកម្ពស់សុខភាពប្រជាជនតាមរយៈការលេងកីឡា ហេតុនេះហើយព្រឹត្តិការណ៍នេះបានជួយច្រើនដល់សង្គមពិសេសលើកទឹកចិត្តដល់យុវជនចាប់អារម្មណ៍លេងកីឡាហែលទឹកផង និងលេងកីឡាទទួលបានសុខភាពល្អផង។ ដូច្នេះលោកអំពាវនាវដល់បណ្ដាក្រុមហ៊ុនឯកជននានាសូមជួយឧបត្ថម្ភគាំទ្រដល់សហព័ន្ធខ្មែរកីឡាហែលទឹកផងដើម្បីមានលទ្ធភាពរៀបចំជាការប្រកួតនានាដល់មហាជន និងយុវជនដើម្បីបណ្ដុះធនធានឲ្យមានកាន់តែច្រើនផងដែរ។

រូបភាពលើផេកសហព័ន្ធ

បញ្ជាក់ដែរថា ការប្រកួតកីឡាហែលទឹក និងហែលទឹកពាក់ជេីងទា ព្រឹទ្ធាចារ្យ ហែម ថុន លើកទី៧ នេះធ្វើរយៈពេលមួយព្រឹក កាលពីថ្ងៃសៅរ៍ ទី១៥ ខែមីនា ឆ្នាំ២០២៥ នៅក្នុងពហុកីឡដ្ឋានជាតិ។ លេខ១ បានលើក្លឹបហែលទឹកក្រសួងសេដ្ឋកិច្ច និងហិរញ្ញវត្ថុ មាស៦ ប្រាក់៣ សំរឹទ្ធ៣។ លេខ២ ក្លឹបកោះធំខេត្តកណ្ដាល មាស៦។ លេខ៣ ក្លឹបក្រសួងព័ត៌មាន មាស៤ ប្រាក់៦ សំរឺទ្ធ៣៕