ច្បាស់ហើយ! តារាឆ្នើម Man UTD ម្នាក់នឹង​ចាកចេញពីក្លិបចប់រដូវកាលនេះ

ខ្សែបម្រើរបស់ Manchester United កីឡាករ Christian Eriksen បានបញ្ជាក់អំពីអនាគតខ្លួន ជាមួយនឹងក្រុមបិសាចក្រហម ដោយទំនង​ជា​នឹងចាកចេញពីទឹកដី Old Trafford នៅដំណាច់រដូវកាល ២០២៤-២០២៥។

Eriksen ត្រូវបាន Man UTD ចុះកុងត្រាយកបានពីក្រុម Brentford កាល​ពី​រដូវក្តៅឆ្នាំ ២០២២ ដោយគ្មានតម្លៃខ្លួន ខណៈកិច្ចសន្យារបស់ខ្សែបម្រើសញ្ជាតិ ដាណឺម៉ាក វ័យ ៣៣ ឆ្នាំរូបនេះ នឹងផុតសុពលភាពនៅរដូវក្តៅខាងមុខ។

ទោះបីជាយ៉ាងណា តាមការបញ្ជាក់ដោយ Eriksen ផ្ទាល់ គឺ Man UTD ទំនង​ជា​មិនបន្តកិច្ចសន្យាថ្មី​ទេ ដូច្នេះ​ គាត់កំពុងតែស្វែងរកក្លិបថ្មី ដើម្បីបន្តអាជីព​បាល់ទាត់។ គាត់ក៏បានបញ្ជាក់ដែរថា គាត់​មិនទាន់ចង់ចាកចេញពីបាល់ទាត់ក្នុងទ្វីប អឺរ៉ុប ឡើយ។

ជុំវិញរឿងរ៉ាវខាងលើ Eriksen បានថ្លែងយ៉ាងដូច្នេះថា​ ៖«ខ្ញុំមិនទាន់បានឮអ្វីពីក្លិប​ឡើយ។ ដូច្នេះហើយខ្ញុំសន្មតថា ការសហការរវាងខ្ញុំ និងក្លិបនឹងត្រូវបញ្ចប់។ នោះជាអ្វី ដែលខ្ញុំត្រូវបកស្រាយ។ កិច្ចសន្យារបស់ខ្ញុំ នឹងផុតសុពលភាពនៅរដូវក្តៅនេះ ហើយខ្ញុំត្រៀម​ខ្លួន​រួច​ហើយ​​ដើម្បីស្វែងរកក្លិបថ្មី។ …បំណងរបស់ខ្ញុំមិនចង់លេងនៅ អង់គ្លេស​ទៀតទេ។ ខ្ញុំនឹងមិនទៅ អាមេរិក ទេ… ខ្ញុំ​ចង់​នៅ​អឺរ៉ុប​បន្ត​ទៀត ​តែ​ប្រហែលនៅជិតផ្ទះរបស់ខ្ញុំ ក្នុងប្រទេស ដាណឺម៉ាក»៕

ប្រែសម្រួលអត្ថបទ៖ សេម កុសល
ប្រភព៖ Sportskeeda