កីឡា

តារាបាល់ទះ៥នាក់ក្នុងលោកជាប់ឈ្មោះជា«អត្តពលិកល្អបំផុតគ្រប់សម័យកាល»

បានផុស

១ សប្តាហ៍ មុន

នៅ

ថ្ងៃពុធ ១៩ មីនា ២០២៥

ដោយ

ពាក្យ GOAT ឬកីឡាករល្អបំផុតគ្រប់សម័យកាល ជាទូទៅអ្នកគាំទ្រតែងតែជជែកវែកញែកអំពីកីឡាបាល់ទាត់ ជាពិសេសរវាងកីឡាករ Cristiano Ronaldo និង Lionel Messi ប៉ុន្តែមែនទែនទៅ ពាក្យនេះក៏ត្រូវបានប្រើនៅក្នុងវិស័យកីឡាបាល់ទះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្តពលិកល្អបំផុតគ្រប់សម័យកាល គឺសម្តៅទៅលើអត្តពលិកលើប្រភេទកីឡាណាមួយ ដែលពួកគេល្អបំផុតលើសអ្នកដទៃក្នុងរយៈពេលជាច្រើនឆ្នាំ។ ខណៈនៅក្នុងវិស័យបាល់ទះវិញ ក៏មានកីឡាករ និងកីឡាការិនីជាច្រើននាក់ដែរ ដែលត្រូវបានគេចាត់ទុកជា GOAT គ្រប់សម័យកាល។

ថ្ងៃនេះសារព័ត៌មាន «កម្ពុជាថ្មី» សូមលើកយកកីឡាករ កីឡាការិនីបាល់ទះ ៥ នាក់ ដែលត្រូវបានគេចាត់ទុកជា អត្តពលិកបាល់ទះល្អបំផុតគ្រប់សម័យកាល៖

៥. កីឡាការិនី Regla Torres

អតីតកីឡាការិនីបាល់ទះជម្រើសជាតិ គុយបា រូបនេះ បានឈ្នះមេដាយមាសអូឡាំពិកចំនួន៣លើកក្នុងអាជីព។ ក្រៅពីមេដាយមាសអូឡាំពិក នាងគឺជាផ្នែកមួយដ៏សំខាន់ ដែលបានជួយក្រុមឈ្នះជើងឯកពិភពលោកចំនួន២លើក និងពានរង្វាន់ FIVB World Cup ចំនួន៣លើក ពីឆ្នាំ ១៩៨៩ ដល់ឆ្នាំ ១៩៩៥។ នាងក៏ត្រូវបានគេដាក់ឈ្មោះជាកីឡាការិនីល្អបំផុតប្រចាំសតវត្សទី ២០ ដោយស្ថាប័នសហព័ន្ធកីឡាបាល់ទះអន្តរជាតិ នៅពេលនាងមានអាយុ ២៦ ឆ្នាំ។

៤. កីឡាករ Lorenzo Bernardi

បច្ចុប្បន្នលោកកំពុងធ្វើការជាគ្រូបង្វឹកក្រុមជម្រើសជាតិអ៉ីតាលី។ Lorenzo គឺជាកីឡាករបាល់ទះដ៏ល្អបំផុតម្នាក់នៅក្នុងពិភពលោក។ កាលនៅជាកីឡាករ លោកធ្លាប់បានជួយ អ៉ីតាលី ឈ្នះមេដាយប្រាក់នៅក្នុងព្រឹត្តិការណ៍អូឡាំពិកឆ្នាំ ១៩៩៦ ហើយបានឈ្នះជើងឯកពិភពលោក២ដង (១៩៩០ និង ១៩៩៤) ក៏ដូចជាជើងឯកអឺរ៉ុប២ដង (១៩៨៩,១៩៩៥) ។ លោកធ្លាប់បានឈ្នះជើងឯកលីគអ៉ីតាលីចំនួន៩ដងនៅក្នុងអាជីពបាល់ទះ។ លោកត្រូវបានគេវិនិច្ឆ័យថា ជាកីឡាករល្អបំផុត ក្នុងព្រឹត្តិការណ៍ ជើងឯកពិភពលោក ឆ្នាំ ១៩៩៤ និងជើងឯកអឺរ៉ុបឆ្នាំ ១៩៩៥ ។ ក្នុងឆ្នាំ ២០០១ សហព័ន្ធកីឡាបាល់ទះអន្តរជាតិ បានប្រកាសថា លោកជា “អ្នកលេងបាល់ទះឆ្នើមបំផុតប្រចាំសតវត្សន៍។

៣. កីឡាការិនី Misty May-Treanor

អតីតអ្នកលេងបាល់ទះឆ្នេរខ្សាច់អាជីពរបស់អាមេរិក ត្រូវបានគេចាត់ទុកជា កីឡាការិនីល្អបំផុតគ្រប់សម័យកាល។ Misty បានចាប់ដៃគូជាមួយ Kerri Walsh Jennings ក្នុងដំណើរឆ្ពោះទៅរកមេដាយមាសអូឡាំពិកចំនួន៣លើក។ ក្រៅពីស្នាដៃក្រុម នាងក៏ទទួលបានជោគជ័យក្នុងលក្ខណៈឯកត្តជនច្រើនផងដែរ។ May-Treanor បានប្រកាសចូលនិវត្តន៍ពីអាជីពបាល់ទះនៅក្នុងឆ្នាំ ២០១២។

២. កីឡាការិនី Kerri Walsh Jennings

នាងគឺជាអតីតដៃគូដ៏ល្អបំផុតរបស់កីឡាការិនី Misty May-Treanor ហើយអ្នកទាំង ២ បានឈ្នះមេដាយមាសអូឡាំពិកជាមួយគ្នាចំនួន ៣ លើក។ Jennings ធ្លាប់បានសាងកំណត់ត្រាដ៏មិនគួរឱ្យជឿមួយជាមួយ Misty May-Treanor ដោយអ្នកទាំងពីរបានឈ្នះការប្រកួតចំនួន ១១២ ប្រកួតជាប់គ្នា និងបានឈ្នះពានរង្វាន់ចំនួន ១៩ ជាប់ៗគ្នាផងដែរ។ ពួកគេបានឈ្នះជើងឯកបាល់ទះឆ្នេរខ្សាច់ពិភពលោក ក្នុងឆ្នាំ ២០០៣, ២០០៥ និង ២០០៧។ អ្នកទាំងពីរត្រូវបានចាត់ទុកជា «ក្រុមបាល់ទះឆ្នេរខ្សាច់ដ៏អស្ចារ្យបំផុតគ្រប់សម័យកាល»។

១. កីឡាករ Karch Kiraly

Karch Kiraly គឺជាអ្នកលេងបាល់ទះដ៏ល្អបំផុតម្នាក់គ្រប់សម័យកាល។ អតីតកីឡាករបាល់ទះអាមេរិកបានឈ្នះមេដាយមាសអូឡាំពិកចំនួន៣លើក គឺឆ្នាំ ១៩៨៤, ១៩៨៨ និង ១៩៩៦។ លោកគឺជាកីឡាករតែម្នាក់គត់នៅក្នុងពិភពលោក ដែលបានឈ្នះមេដាយអូឡាំពិកទាំងក្នុងប្រភេទបាល់ទះក្នុងសាល និងបាល់ទះឆ្នេរខ្សាច់។ បច្ចុប្បន្នលោកជាគ្រូបង្វឹកក្រុមបាល់ទះជម្រើសជាតិនារីរបស់សហរដ្ឋអាមេរិក។