នោះៗ! អង្គរក្ស Messi បបួល Logan Paul ឡើងសង្វៀន ដើម្បីជម្រះបញ្ជីជូនម្ចាស់ខ្លួន

អង្គរក្សផ្ទាល់ខ្លួនរបស់ Lionel Messi លោក Yassine Cheuko បានបង្ហាញការស្ម័គ្រចិត្តឡើងសង្វៀនជំនួសម្ចាស់ខ្លួន បន្ទាប់ពីតារាប្រចាំសង្វៀន WWE កីឡាករ Logan Paul បបួលខ្សែប្រយុទ្ធរបស់ក្រុម Inter Miami វ៉ៃគ្នាកាលពីពេលថ្មីៗនេះ។

ដំណើដើមទងនៃរឿងនេះបានកើតឡើង ក្រោយ Leo Messi បានបង្កើតភេស្ជៈបំពេញជាតិទឹកម៉ាក Mas+ កាលពីឆ្នាំ ២០២៤ ខណៈភេជ្ជៈនេះ គឺមានការវេចខ្ចប់ស្រដៀងគ្នានឹងភេស្ជៈបំពេញជាតិទឹកម៉ាក PRIME របស់ Logan Paul ដែលត្រូវបានបង្កើតឡើងតាំងពី ២ ឆ្នាំមុន។

បន្ទាប់មក ខាងក្រុមហ៊ុន PRIME ក៏បានដាក់ពាក្យបណ្តឹងតាមផ្លូវច្បាប់ទៅលើក្រុមហ៊ុន Mas+ ដោយចោទប្រកាន់ ពី​ការ​ចម្លងតាមការវេចខ្ចប់របស់ខ្លួន ហើយបានទាមទារឱ្យក្រុមហ៊ុន Mas+ របស់ Messi កែប្រែ​រូបរាងផលិតផលដបរបស់ពួកគេជាបន្ទាន់។

មិនទាន់ចប់ត្រឹមនេះនោះទេ Logan Paul ថែមទាំងបានទទូចឱ្យ Messi ឡើងសង្វៀនប្រកួតជាមួយខ្លួន ដើម្បីជម្រះបញ្ជីលើរឿងនេះទៀតផង។ ប៉ុន្តែថ្មីៗនេះអង្គរក្ស Messi បានចេញមុខឆ្លើយតបជំនួស ដោយ​បោះពាក្យ​សំដី​ថា៖ «Leo មិនទាំងដែលស្គាល់ ថា ម្នាក់នេះជានរណាផង។ ប្រសិនបើគាត់ចង់វាយគ្នាមែន គាត់អាចមកវាយជាមួយខ្ញុំបាន មិនមែនទៅវាយជាមួយកីឡាករបាល់ទាត់អីចឹងទេ»៕

ប្រែសម្រួលអត្ថបទ៖ សេម កុសល
ប្រភព៖ Metro