កីឡាករ Jenia Grebennikov ស្តេចលីប៊ើរ៉ូ បាល់ទះ ក្នុងពិភពលោក

តួនាទីលីប៊ើរ៉ូ (Libero) នៅក្នុងកីឡាបាល់ទះ គឺជាតួនាទីដ៏សំខាន់មួយ ក្នុងការជួយសង្គ្រោះបាល់ នៅពេលខាងគូប្រកួតផ្តាច់គ្រាប់បាល់រកពិន្ទុ។ ងាកទៅកាន់ពិភពលោក គេបានចាត់ទុកកីឡាករជម្រើសជាតិ បារាំង Jenia Grebennikov ជាកំពូលកីឡាករនៅក្នុងតួនាទីនេះ ឬ King of libero។ តើកីឡាករជនជាតិដើម រុស្ស៊ី-សញ្ជាតិ បារាំងរូបនេះ មានប្រវត្តិសាវតា និងចំណុចពិសេសអ្វីខ្លះ ទើបគេដាក់រហស្សនាមឱ្យបែបនេះ?

រហស្សនាម«ស្តេច​លីប៊ើរ៉ូ» នេះមិនមែនគេចេះតែដាក់នោះទេ ប៉ុន្តែវាបានស្តែងចេញឡើង ដោយសារ Jenia Grebennikov ជាកីឡាករម្នាក់ ដែលមានសមត្ថភាពលេចធ្លោរខ្លាំង​ខុសពីកីឡាករដទៃ។ គាត់ គឺជាកីឡាករម្នាក់ ដែលមានទេពកោសល្យខ្ពស់ បូកផ្សំជាមួយភាពរហ័សរហួន រវៀសរវៃ និងអាចជួយសង្គ្រោះពីការរកគ្រាប់បាល់របស់ក្រុមគូប្រកួតសឹងតែគ្រប់ស្ថានការណ៍។ បើនិយាយអំពីកំណត់ត្រាវិញ តារាបាល់ទះកម្ពស់ ១.៨៨ ម៉ែត្រ រូបនេះ បានឈ្នះពានជាច្រើនទាំងលក្ខណៈបុគ្គល ក្លិបអាជីព និងជម្រើសជាតិ។

ដកស្រង់ប្រវត្តិត្រួសៗ Jenia Grebennikov បានកើតនៅថ្ងៃទី ១៣ ខែ សីហា ឆ្នាំ ១៩៩០ ក្នុងទីក្រុង Rennes ប្រទេស បារាំង ខណៈបច្ចុប្បន្នមានវ័យ ៣៤ ឆ្នាំ។ គាត់មានឪពុកជាជនជាតិ រុស្ស៊ី គឺលោក Boris Grebennikov ដែលជាអតីតកីឡាករបាល់ទះម្នាក់ផងដែរ។ Jenia បានចាប់ផ្តើមលេងបាល់ទះតាំងពីក្មេង ក្រោមការបង្ហាត់បង្ហាញដោយលោកឪពុក ហើយក្រៅពីនេះ គាត់ក៏មានជំនាញលេងកីឡាវាយកូនបាល់លើទឹកកក (Hockey) ផងដែរ ។

ប៉ុន្តែ Jenia បានសម្រេចចិត្តជ្រើសរើសផ្លូវ ជាកីឡាករបាល់ទះអាជីពនៅក្នុងឆ្នាំ ២០១២ នៅពេលគាត់មានវ័យ ២២ ឆ្នាំ។ ក្នុងឆ្នាំដំបូងនោះ គាត់បានជួយឱ្យក្រុមបាល់ទះ Rennes Volley 35 ឈ្នះពាន French Cup ផងដែរ។ លុះក្រោយមកទៀត គាត់បានឈ្នះពានជាច្រើនជាមួយក្លិប ដែលគាត់ធ្លាប់លេង ដូចជា German Cup ២ លើក និង German Championship ១ លើកជាមួយក្លិប VFB Friedrichshafen, ពាន Italian Cup ១លើក និង Italian Championship ១ លើកជាមួយក្លិប Cucine Lube Civitanova ខណៈបច្ចុប្បន្ននេះ គាត់កំពុងលេងនៅក្លិប Zenit Saint Petersburg ក្នុងប្រទេស រុស្ស៊ី។

ងាកទៅមើលកំណត់ត្រាជាមួយក្រុមជម្រើសជាតិ បារាំង វិញ គាត់ធ្លាប់បានឈ្នះពានរង្វាន់ជាច្រើន ដូចជាមេដាយមាសព្រឹត្តិការណ៍ អូឡាំពិក ២ លើក, មេដាយមាសព្រឹត្តិការណ៍ FIVB World League ២ លើក , មេដាយមាស ព្រឹត្តិការណ៍ FIVB Nations League ២ លើក និងមេដាយមួយចំនួនទៀត។

ស្លេះរឿងក្លិប និងជម្រើសជាតិត្រឹមនេះ យើង​ក្រឡេកទៅមើលកំណត់ត្រាលក្ខណៈឯកត្តជន​វិញ។ គាត់ពិតជាធ្វើបានល្អខ្លាំងមែនទែននៅក្នុងតួនាទីនេះ។ ក្នុងនោះគាត់ធ្លាប់ឈ្នះ​ពាន​លីប៊ើរ៉ូ​ឆ្នើម​ប្រចាំពាន French Championship ២ លើក, ប្រចាំ​ពាន​រង្វាន់ FIVB World Championship ១លើក, ប្រចាំ​ពាន​រង្វាន់​ FIVB World League ១ លើក, ប្រចាំព្រឹត្តិការណ៍ អូឡាំពិក នៅ​ឆ្នាំ ២០២៤ និងនៅក្នុងកម្មវិធីជាច្រើនទៀត៕

អត្ថបទ៖ សេម កុសល