ក្លិប​ធំ​២​​កំពុងឃ្លាំមើល Sancho ខណៈអនាគតគេស្រពិចស្រពិល

ក្លិបនៅតំបន់ អឺរ៉ុប ចំនួន ២ កំពុងតាមដានលើស្ថានភាពរបស់ខ្សែប្រយុទ្ធស្លាប Jadon Sancho ស្របពេល​រូបគេ កំពុងមានអនាគតមិនច្បាស់លាស់ទាំងជាមួយ Chelsea និង Manchester United។

Sancho ត្រូវបាន Manchester United ចុះកុងត្រាយកបានពីក្រុម Borussia Dortmund កាលពីរដូវកាលក្តៅឆ្នាំ ២០២១។ ក្រោយលេងនៅទីនោះបានរយៈពេល ២ រដូវកាល ខ្សែប្រយុទ្ធសញ្ជាតិ អង់គ្លេស វ័យ ២៥ ឆ្នាំ ហាក់មានការធ្លាក់ចុះសមត្ថភាពខ្លាំង ហើយមិនត្រឹមតែប៉ុណ្ណោះរូបគេក៏មានភាពរកាំរកូសជាមួយគ្រូបង្វឹកផងដែរ នៅ​ពេលនោះស្ថិតក្រោមការដឹកនាំរបស់លោក Erik ten Hag។

យ៉ាងណាមិញ នៅខែ មករា ឆ្នាំ ២០២៤ រូបគេក៏ត្រូវបាន Man United ដាក់ឱ្យ Borussia Dortmund ខ្ចីជើងកន្លះរដូវកាល ហើយបន្ទាប់មកទៀត បន្តដាក់ឱ្យ Chelsea ខ្ចីជើងវិញម្តង ក្នុងកិច្ចសន្យារយៈពេល ១ រដូវកាល អមជាមួយជម្រើសទិញផ្តាច់តម្លៃ ៣២ លានដុល្លារអាមេរិក។

ថ្មីៗនេះអ្នកកាសែតលោក David Ornstein បានឱ្យដឹងថា Chelsea ហាក់ចង់ដកខ្លួនពីការចុះកុងត្រាយក Sancho ជាអចិន្ត្រៃយ៍ ប៉ុន្តែពួកគេអាចនឹងពិចារណានាំយកខ្សែប្រយុទ្ធសញ្ជាតិ អង់គ្លេស រូបនេះ ដោយព្រមបង់ថ្លៃផ្ទេរទៅ Man United ត្រឹមតែ ៦ លានដុល្លារអាមេរិកប៉ុណ្ណោះ។

ខណៈអនាគតរបស់ Sancho កំពុងមិនច្បាស់លាស់បែបនេះ សារព័ត៌មាន GiveMeSport បានអះអាងថា ក្លិប Bayer Leverkusen និង Borussia Dortmund កំពុងតែតាមដានយ៉ាងយកចិត្តទុកដាក់លើស្ថានភាពរបស់អតីតថ្នាលយុវជនក្រុម Manchester City ហើយពួកគេអាចនឹងដាក់សំណើផ្ទេរនៅទីផ្សារដោះដូរកីឡាកររដូវក្តៅនេះតែម្តង៕

ប្រែសម្រួលអត្ថបទ៖ សេម កុសល
ប្រភព៖ Sportbible