កីឡា

ការធ្វើតេស្តជ្រើសរើសសេះល្អទៅប្រកួត ក្នុងព្រឹត្តិការណ៍ អង្គរសង្រ្កាន្តសៀមរាប

បានផុស

២ ថ្ងៃ មុន

នៅ

ថ្ងៃព្រហស្បតិ៍ ២៧ មីនា ២០២៥

ដោយ

សកម្មភាពបែបប្រពៃណី និងកីឡាជាច្រើនប្រភេទនឹងដាក់ឲ្យលេង ឬទស្សនានៅព្រឹត្តិការណ៍អង្គរសង្ក្រាន្ត នាខេត្តសៀមរាប ខណៈក្រុមការងារ សហភាពសហព័ន្ធយុវជនកម្ពុជា សម្រេចដាក់បញ្ចូលកីឡាប្រណាំងសេះមួយប្រភេទទៀតជូនមហាជនឲ្យស្គាល់ និងបានកម្សាន្តសប្បាយបន្ថែម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឡាក់ ភីរុណ

លោក ឡាក់ ភីរុណ មកពីសហព័ន្ធសហភាពយុវជនកម្ពុជា ផ្នែកប្រណាំងរទេះគោ ក្របី បានឲ្យដឹងថា ក្រុមការងារតែងតែរកនូវអ្វីដែលថ្មី ប្លែក និងអស្ចារ្យដើម្បីជាទីចាប់អារម្មណ៍បង្កភាពសប្បាយរីករាយដល់មហាជនដែលចូលរួមពិសេសក្នុងព្រឹត្តិការណ៍អង្គរសង្ក្រាន្ត នៅខេត្តសៀមរាបខាងមុខនេះ។

ទិដ្ឋភាពធ្វើតេស្ត

ដូច្នេះហើយក្រុមការងារបានសម្រេចដាក់បញ្ចូលកីឡាប្រណាំងសេះមួយប្រភេទទៀតដើម្បីលើកស្ទួយវិស័យកីឡាមួយនេះផង និងជាការផ្សព្វផ្សាយដល់ប្រជាពលរដ្ឋបានទស្សនាប្លែកអារម្មណ៍ផង។ កាលពីរសៀល ថ្ងៃទី២៦ ខែមីនា ឆ្នាំ២០២៥ ក្រុមការងារ រួមជាមួយគ្រូបង្វឹកសហព័ន្ធកម្ពុជាបង្ហាត់ជិះសេះ បានធ្វើតេស្តសេះប្រមាណ២០ក្បាលដើម្បីជ្រើសរើសយកទៅប្រកួតនៅសង្ក្រាន្តសៀមរាប។

ទិដ្ឋភាពធ្វើតេស្ត

លោក ឡាក់ ភីរុណ បានអំពាវនាវដល់ប្រជាពលរដ្ឋទាំងអស់ដែលអញ្ជើញចូលរួមព្រឹត្តិការណ៍អង្គរសង្ក្រាន្ត នៅខេត្តសៀមរាប សូមកុំភ្លេចទៅទស្សនាការប្រណាំងរទេះគោ ក្របី និងសេះ ដែលនឹងធ្វើឡើងរយៈពេល ៣ថ្ងៃចាប់ពីវេលាម៉ោង ២.៣០នាទីរសៀលតទៅតំបន់អង្គរឃ្យូយូ។

កម្មវិធីតេស្តជ្រើសរើសសេះដែលគ្រប់លក្ខខណ្ឌនេះធ្វើឡើងកាលពីរសៀលថ្ងៃទី២៦ ខែមីនា ឆ្នាំ២០២៥ ទីតាំងដីវាលមួយកន្លែងក្បែរផែស្ងួត សូ ហួង តាមបណ្ដោយផ្លូវវ៉េងស្រេង រាជធានីភ្នំពេញ។ សេះចំនួន ៦ក្បាលនឹងត្រូវយកទៅបង្គ្រប់ជាមួយសេះតាមបណ្ដាខេត្តផ្សេងៗទៀតសរុបទាំងអស់១៥ក្បាលដើម្បីចូលរួមប្រណាំងថ្ងៃអង្គរសង្ក្រាន្តសៀមរាបខាងមុខ៕