Ronaldo ជម្រុញឱ្យសិស្សប្អូននៅ ព័រទុយហ្គាល់ ម្នាក់ផ្លាស់ទៅ Man UTD

កីឡាករ Cristiano Ronaldo បានជម្រុញឱ្យសិស្សប្អូននៅក្នុងក្រុមជម្រើសជាតិ ព័រទុយហ្គាល់ កីឡាករ Francisco Trincao ផ្លាស់ទៅកាន់ Manchester United នៅរដូវក្តៅនេះ។

Trincao ធ្លាប់ជាអតីតខ្សែប្រយុទ្ធស្លាបរបស់ Barcelona ចន្លោះពីឆ្នាំ ២០២០ ដល់ ២០២៣ ប៉ុន្តែបច្ចុប្បន្នកីឡាករវ័យ ២៥ ឆ្នាំរូបនេះ បានផ្លាស់មកកាន់ក្លិប Sporting CP ក្នុងប្រទេស ព័រទុយហ្គាល់ហើយ។

Trincao កំពុងបង្ហាញសមត្ថភាពគួរឱ្យចាប់អារម្មណ៍មែនទែនជាមួយក្លិប Sporting ហើយថ្មីៗនេះអ្នកកាសែតលោក Graeme Bailey បានអះអាងថា Man UTD ដែលស្ថិតក្រោមការដឹកនាំរបស់លោក Ruben Amorim ហាក់មានការកោតសរសើរលើរូបគេ និងកំពុងមានចំណាប់អារម្មណ៍ចង់បានរូបគេផងដែរ។

ទន្ទឹមនឹងនេះ ប្រភពពីបរទេសបានរាយការណ៍ថា Trincao ក៏កំពុងទទួលបានការគាំទ្រ និងការជម្រុញពីសិស្សច្បង ៣ រូបឱ្យរូបគេផ្លាស់ទៅទឹកដី Old Trafford ផងដែរ ដូចជា Ronaldo, Bruno Fernandes និង Diogo Dalot។

សូមបញ្ជាក់ថា Trincao ធ្លាប់បានធ្វើការជាមួយលោក Amorim ម្តងហើយនៅ Sporting ក្នុងនោះរូបគេបង្ហាញខ្លួនបានចំនួន ១៣១ ដង និងរកបានគ្រាប់បាល់ ៣១ គ្រាប់ និង ២៥ បញ្ជូន(assist)៕

ប្រែសម្រួលអត្ថបទ៖ សេម កុសល
ប្រភព៖ Sportskeeda