កីឡា

គ្រូបង្វឹកបាល់បោះជនពិការ ប្រាប់ពីវិធីហាត់ ឈានដណ្ដើមបានមេដាយមាស

បានផុស

២ ម៉ោង មុន

នៅ

ថ្ងៃអង្គារ ១ មេសា ២០២៥

ដោយ

គ្រូបង្វឹកក្រុមបាល់បោះជនពិការបានលើកឡើងពីការឈ្នះមេដាយមាសនេះឡើងគឺមានវិធីសាស្ត្រហ្វឹកហាត់ និងចិត្តសាស្ត្រច្រើនសម្រាប់ក្រុមកម្ពុជាទាំងអស់ទើបទទួលបានលទ្ធផលល្អបែបនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក យុង សុខុម

លោក យុង សុខុម គ្រូបង្វឹកក្រុមបាល់បោះជនពិការកម្ពុជា បានឲ្យដឹងថា ការហ្វឹកហាត់គឺមានរយៈពេលខ្លីនោះទេមុនឈានដល់ថ្ងៃប្រកួតកាលពីថ្ងៃទី២៨ ដល់ ៣០ ខែមីនា ឆ្នាំ២០២៥។ កីឡាករ កីឡាការិនីកម្ពុជាមានគ្រឹះខាងបាល់ទះអង្គុយចេះលេងស្រាប់ ដូច្នេះងាយក្នុងការហាត់បាល់បោះជនពិការដែលជាប្រភេទកីឡាថ្មីនេះឆាប់ចាប់បាន និងធ្វើបានល្អ។

ទិដ្ឋភាពវគ្គផ្ដាច់ព្រ័ត្រ

គ្រូបង្វឹកជើងចាស់រូបនេះបន្ថែមទៀតថា រយៈពេល២ខែនេះលោកបានយកបាល់បោះមកបង្ហាត់ដល់សិស្សៗ។ ទី១ ពង្រឹងម្រាមដៃឲ្យរឹង ទី២ ហាត់បាល់បោះវាធ្ងន់ធ្វើឲ្យដៃមានកម្លាំងខ្លាំង ដូច្នេះនៅពេលការប្រកួតមកដល់ខាងសហព័ន្ធបាល់បោះពិភពលោកយកបាល់មកវាស្រាលជាងនាំឲ្យក្រុមកម្ពុជារឹតតែមានប្រៀប។ មួយវិញទៀតកីឡាករធ្លាប់ចាប់បាល់ធ្ងន់ ហេតុដូចនេះពេលចាប់បាល់ស្រាលវិញល្មមៗមិនផ្លិតនោះទេ។ ប្រទេសចូលរួមផ្សេងៗដាក់ជាចម្ងល់ថា ហេតុអ្វីក្រុមកីឡាកម្ពុជាមានកម្លាំងដៃខ្លាំង លឿនល្អម្ល៉េះ។

ទិដ្ឋភាពវគ្គផ្ដាច់ព្រ័ត្រ

រឿងសំខាន់មួយទៀតនោះ លោក យុង សុខុម បានផ្ដល់ចិត្តសាស្ត្រក្នុងការទប់អារម្មណ៍ឲ្យបានដូចជា លេងដោយអារម្មណ៍ស្ងប់ បើឆេវឆាវលេងមិនបានទេ។ បើទោះជាបោះមិនចូល ឬបោះមិនស៊ីក៏ដោយត្រូវបន្តខំប្រឹងទៀតមិនខឹងក្រោធ ឬឆេវឆាវឡើយ។ បន្ថែមពីនេះទៀតគឺការចាប់របស់អាជ្ញាកណ្ដាលកីឡាករមិនត្រូវមានអារម្មណ៍មិនល្អ ឬតបតជាមួយនោះឡើយ ដូច្នេះគិតតែប្រមូលស្មារតីប្រកួត។

ពិធីបំពាក់មេដាយ

បញ្ជាក់ដែរថា ក្រុមបាល់បោះជនពិការកម្ពុជាទាំងវិញ្ញាសាបុរស និង នារី សុទ្ធតែឈ្នះមេដាយមាស ក្នុងព្រឹត្តិការណ៍ជ្រើសរើសជើងឯកអាស៊ី លើកទី១ កាលពីថ្ងៃទី២៨ ដល់ ៣០ ខែមីនា ឆ្នាំ២០២៥ នៅ NPCC។ ផ្នែកបុរស មេដាយមាស បានលើកម្ពុជា មេដាយប្រាក់ ស្រីលង្កា និង មេដាយសំរឹទ្ធ បានលើប្រទេសឥណ្ឌា។ ចំណែកផ្នែកនារី មេដាយមាស បានទៅកម្ពុជា មេដាយប្រាក់ បានទៅ ថៃ និងមេដាយសំរឹទ្ធ បានទៅឥណ្ឌា៕