កីឡា

ចេញទៅ អាមេរិក លើកនេះ គុនខ្មែរ នឹងចាប់ដៃស្ថាប័ន WCK ប្រកួតច្បាប់គុនខ្មែរ

បានផុស

៣ សប្តាហ៍ មុន

នៅ

ថ្ងៃអង្គារ ១ មេសា ២០២៥

ដោយ

នៅសល់ត្រឹមតែជិត ២ សប្តាហ៍ទៀតប៉ុណ្ណោះ ពោលគឺនៅថ្ងៃ អាទិត្យ ទី ១៣ ខែ មេសា នឹងដល់ការប្រកួតរវាងកីឡាករគុនខ្មែរ ទល់នឹងអ្នកប្រដាល់ អាមេរិក នៅទឹកដី សហរដ្ឋអាមេរិក ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាសភាពកីឡាករគុនខ្មែរ ដែលនឹងត្រូវចេញទៅប្រកួតនោះទីនោះរួមមាន កីឡាករ ពេជ្រ សម្បត្តិ, រឿង សោភ័ណ្ឌ, ធន់ រិទ្ធី និងកីឡាការិនី អេ យ៉ានុត។ ក្នុងនោះគូប្រកួតនីមួយៗក៏បានប្រកាសរួចរាល់ហើយដែរ ប៉ុន្តែគូ ដែលគួរឲ្យចាប់អារម្មណ៍ជាងគេ គឺដៃគូរបស់ពេជ្រ សម្បត្តិ គកីឡាករអាមេរិក Edgar Tabares ដែលធ្លាប់មានប្រវត្តិជួបជាមួយអ្នកប្រដាល់ ថៃ រ៉ដថាំង នៅសង្វៀន ONE Championship កាលពីខែ ឧសភា ឆ្នាំ ២០២៣។

នៅក្នុងសន្នសីទកាសែតមុនចេញដំណើទៅ អាមេរិក នារសៀលថ្ងៃទី ០១ ខែ មេសា នេះ លោក ខូវ ឆាយ ប្រធានសហព័ន្ធប្រដាល់គុនខ្មែរ បានមានប្រសាសន៍អំពីច្បាប់ និងលក្ខខណ្ឌប្រកួតយ៉ាងដូច្នេះថា ៖«កីឡាករទាំង ៤ នាក់ នឹងប្រកួតដណ្តើមខ្សែក្រវាត់ទាំង ៤ នាក់តែម្តង។ មាន ២ រូប នឹងប្រកួតដណ្តើមខ្សែក្រវាត់គុនខ្មែរ (កម្ពុជា-អាមេរិក) គឺអេ យ៉ានុត និងរឿង សោភ័ណ្ឌ។ លក្ខខណ្ឌនៃការប្រកួត នឹងប្រកួត ៣ ទឹក ដោយប្រើច្បាប់គុនខ្មែរ។ ចំណែក ពេជ្រ សម្បត្តិ និង ធន់ រិទ្ធី នឹងប្រកួតដណ្តើមខ្សែក្រវាត់ WCK Kun Khmer របស់សហរដ្ឋអាមេរិក ដែលនឹងប្រកួតលក្ខខណ្ឌ ៥ ទឹក ហើយប្រើប្រាស់ច្បាប់គុនខ្មែរដូចគ្នា»។

លោក ខូវ ឆាយ បានបន្តទៀតថា ៖«ការរៀបចំការប្រកួតលើកនេះ យើងនឹងចាប់ដៃគូជាមួយស្ថាប័ន WCK ដែលជាស្ថាប័នមួយមានអាជ្ញាប័នរៀបចំការប្រកួតនៅ សហរដ្ឋអាមេរិក ជាពិសេសគឺរដ្ឋ កាលីហ្វ័រញ៉ា តែម្តង។ ការចាប់ដៃគូលើកនេះ យើងសហការរៀបចំនៅក្នុងលក្ខខណ្ឌ ដោយប្រើប្រាស់ឈ្មោះគុនខ្មែរតែម្តង»។

សូមបញ្ជាក់ថា កីឡាករ កីឡាការិនី ទាំង ៤ រូប និង ប្រតិភូកីឡាប្រដាល់គុនខ្មែរនឹងចេញដំណើពី កម្ពុជា ទៅ អាមេរិក នៅព្រឹកថ្ងៃ ពុធ ទី ២ ខែ មេសា ស្អែកនេះ៕