កីឡា

កីឡាករ រស្មី គុនខ្មែរ មិនទាន់សម្រេចបំណងធំមួយតាំងពីម្ដាយមិនទាន់លាចាកលោក

បានផុស

៤៦ វិនាទី មុន

នៅ

ថ្ងៃពុធ ២ មេសា ២០២៥

ដោយ

អ្នកលេងគុនខ្មែរ រស្មី គុនខ្មែរ ឬហៅថា អេលីត រស្មី ថាខ្លួនមិនទាន់សម្រេចបំណងធំមួយគឺដណ្ដើមខ្សែក្រវាត់ឲ្យបាន ១គ្រឿងតាំងពីម្ដាយមិនទាន់លាចាកលោកមកម្ល៉េះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបភាពហ្វេសបុក រស្មី គុនខ្មែរ

រស្មី គុនខ្មែរ ថ្លែងទាំងទឹកមុខក្រៀមក្រំថា បំណងប្រាថ្នាធំរបស់ខ្លួនគឺវាយឈ្នះខ្សែក្រវាត់ឲ្យបាន ១គ្រឿងនៅថ្ងៃណាមួយជូនលោកឪពុក អ្នកម្ដាយ។ ប៉ុន្តែអ្វីដែលសោកស្ដាយបំផុតនោះគឺម្ដាយរបស់ខ្លួនបានលាទៅរហូតហើយ ខណៈខ្លួនមិនទាន់សម្រេចបំណងឈ្នះខ្សែក្រវាត់នៅឡើយទេ។ សម្ដីរបស់ រស្មី៖ «ថ្ងៃណាមួយខ្ញុំនឹងយកខ្សែក្រវាត់មកជូនម៉ែឲ្យបានបើម៉ែមិនបានឃើញផ្ទាល់ក៏ដោយ»។

កីឡាករ រស្មី គុនខ្មែរ

អ្នកលេងគុនខ្មែរទម្ងន់ស្រាលរូបនេះបន្ថែមទៀតថា ខ្លួននឹងនៅតែបន្តខំប្រឹងបន្ថែមទៀតលើការហ្វឹកហាត់ សាងកេរ្តិ៍ឈ្មោះ និងដណ្ដើមខ្សែក្រវាត់ឲ្យបាននៅថ្ងៃណាមួយជូនឪពុក និងម្ដាយដែលទើបលាចាកលោកនេះទៅហើយ។ មានតែការខំប្រឹងប៉ុណ្ណោះទើបឈានសម្រេចបំណងធំមួយនេះ។

រស្មី គុនខ្មែរ កំពុងហ្វឹកហាត់

សិស្សគុនក្លឹបគុនខ្មែរដូនតាខាងលើបន្ថែមទៀតថា ឱកាសលេងខ្សែក្រវាត់មានប៉ុន្មានដងដែរ ប៉ុន្តែរូបគេធ្វើមិនសូវបានល្អ និងមានចំណុចខ្វះខាតត្រូវបំពេញបន្ថែមទៀត។ មួយវិញទៀតទម្ងន់ស្រាល ៥១-៥២ គីឡូក្រាមនេះសំបូរកីឡាករល្អៗច្រើន។

បញ្ជាក់ដែរថា រស្មី គុនខ្មែរ ជាកីឡាករហ្វឹកហាត់នៅក្លឹបគុនខ្មែរដូនតា បង្ហាត់ដោយលោក ឃឹម សុជាតិ។ រូបគេប្រឡូកក្នុងវិស័យប្រដាល់នេះយូរឆ្នាំដែរហើយដោយក្លឹបដើមរបស់គេនោះគឺក្លឹបឆ្មាសសែនសុខ ដឹកនាំ និងបង្ហាត់ដោយលោក ស៊ន អេលីត៕

អត្ថបទដោយ៖ នួន ស៊ីណ

Related Topics:កីឡាប្រដាល់គុនខ្មែរ