លោក Ronaldinho ចុចឈ្មោះកីឡាករ​ម្នាក់​ដ៏​ភ្ញាក់ផ្អើល ជាកីឡាករល្អបំផុតក្នុងលោកបច្ចុប្បន្ន

វីរបុរស Barcelona លោក Ronaldinho បានបង្ហាញទស្សនៈផ្ទាល់ខ្លួន ដោយជ្រើសរើសកីឡាករដ៏ភ្ញាក់ផ្អើលម្នាក់ ជាកីឡាករល្អបំផុតក្នុងពិភពលោកនាពេលបច្ចុប្បន្ន។

នៅក្នុងវិថីបាល់ទាត់បច្ចុប្បន្ន មានកីឡាករវ័យក្មេងៗជំនាន់ក្រោយជាច្រើន ដែលកំពុងរះឡើង ក្នុងនោះមាន Lamine Yamal, Vinicius, Kylian Mbappe, Erling Haaland និងកីឡាករមួយចំនួនទៀត ប៉ុន្តែផ្ទុយទៅវិញ កីឡាករ ដែលវីរបុរស ប្រេស៊ីល វ័យ ៤៥ ឆ្នាំជ្រើសរើសជាកីឡាករ ដែលធ្វើឱ្យលោកភ្ញាក់ផ្អើល និងជ្រើសរើសជាកីឡាករល្អបំផុតបច្ចុប្បន្ន នោះគឺជាខ្សែប្រយុទ្ធរបស់ក្រុម Paris Saint-Germain កីឡាករ Ousmane Dembele។

ថ្លែងនៅក្នុងកិច្ចសម្ភាសន៍ជាមួយសារព័ត៌មាន បារាំង L’Equipe នៅពេលគេសួរថា កីឡាករបច្ចុប្បន្នរូបណា ដែលលោកគិតថា ជាកីឡាករល្អបំផុតបច្ចុប្បន្ន?​ ភ្លាមនោះលោក Ronaldinho បានឆ្លើយតបទៅវិញយ៉ាងដូច្នេះថា៖ «ខ្ញុំមិនចូលចិត្តការប្រៀបធៀបច្រើនទេ។ ខ្ញុំភាគច្រើន គឺមើលទៅលើក្រុមចាស់ៗរបស់ខ្ញុំ និងក្រុមនៅ Champions League។ ម្នាក់នោះគឺ Ousmane Dembele នៅ PSG។ ខ្ញុំចូលចិត្តគាត់ខ្លាំងណាស់។ គាត់មានរបៀបលេងជាស្ទាយ៍របស់ ប្រេស៊ីល…»។

Dembele នៅរដូវកាលនេះ កំពុងបង្ហាញសមត្ថភាពលេចធ្លោរខ្លាំងមែនទែន ក្រោមការដឹកនាំរបស់ Luis Enrique នៅ PSG ក្នុងនោះរូបគេស៊ុតបញ្ចូលទីបាន ៣២ គ្រាប់ហើយ ក្នុងការបង្ហាញខ្លួនចំនួន ៤០ ប្រកួត ហើយរូបគេក៏កំពុងក្លាយជាចំណែកយ៉ាងធំ ក្នុងការជួយឱ្យក្រុមអ្នកមានបារាំងឆ្ពោះរកការឈ្នះពាន Ligue 1 និង Champions League ផងដែរ៕

ប្រែសម្រួលអត្ថបទ៖ សេម កុសល
ប្រភព៖ Sportbible