មិនធម្មតា! Arkadag ដៃ​គូ​របស់​ ព្រះខ័នរាជស្វាយរៀង​ ជាជើង​ឯក​លីគ ២ រដូវកាលជាប់គ្នា

ក្រុមមកពីប្រទេស តួកមេនីស្ថាន FK Arkadag គឺជាគូប្រកួតមកពីតំបន់អាស៊ីខាងលិច ដែលត្រូវជួបជាមួយក្រុមតំណាងកម្ពុជា ព្រះខ័នរាជស្វាយរៀង ក្នុង​វគ្គផ្តាច់ព្រ័ត្រពានរង្វាន់ AFC Challenge League ថ្ងៃទី ១០ ខែ ឧសភា ​នៅ​ពហុកីឡដ្ឋាន​ជាតិ​មរតក​តេជោ។

ដកស្រង់ត្រួសៗអំពីក្រុមមកពី តួកមេនីស្ថានមួយនេះ ពួកគេគឺជាក្រុមមួយ ដែលទើបបង្កើតឡើងជាផ្លូវការនៅឆ្នាំ ២០២៣ មានប្រធានក្លិប គឺលោក Arslanmyrat Amanow។ ដ្បិតទើបបង្កើតឡើងបានរយៈពេល ៣ ឆ្នាំ ប៉ុន្តែក្រុម FK Arkadag ពិតជាមានភាពខ្លាំងក្លាមែនទែន។ ពួកគេបានឈ្នះជើងឯកលីគ តួកមេនីស្ថាន (Turkmenistan Champion) ២ រដូវកាលជាប់គ្នា គឺរដូវកាល ២០២២-២០២៣ និង ២០២៣-២០២៤ ខណៈរដូវកាល ២០២៤-២០២៥ នេះ ពួកគេក៏នៅបន្តភាពខ្លាំងផងដែរ ដោយឆ្លងកាត់ ២ ប្រកួតកន្លងមក ពួកគេមិនទាន់ចាញ់នៅឡើយទេ។

ក្រៅពីពានលីគ ក្រុម FK Arkadag ក៏បានឈ្នះពាន Turkmenistan Cup ម្តងផងដែរ គឺនៅរដូវកាល ២០២២-២០២៣។ បច្ចុប្បន្ន ពួកគេកំពុងតែបង្ហាញភាពខ្លាំងរបស់ខ្លួនថែមទៀត ដោយមុនទទួលកៅអីឡើងមកជួប ព្រះខ័នស្វាយរៀងនៅវគ្គផ្តាច់ព្រ័ត្រនេះ ​​ពួកគេបានបំបាក់ក្រុមមកពី គុយវ៉ែត Al-Arabi SC សរុបលទ្ធផលទាំង ២ ជើង ៣-២។

ក្រុម FK Arkadag គឺមិនប្រើប្រាស់កីឡាករបរទេសនោះទេ ដោយកីឡាករ​ទាំង ២៤ នាក់សុទ្ធតែជាជនជាតិ តួកមេនីស្ថាន ខណៈគ្រូបង្វឹករបស់ពួកគេ ក៏ជាជនជាតិ តួកមេនីស្ថាន ផងដែរ គឺលោក Akhmet Allaberdiyev៕

អត្ថបទ៖ សេម កុសល