ជំនួបភ្នំពេញក្រោន និងវិសាខា ស្អែកត្រូវលើកពេល ដើម្បីគោរពវិញ្ញាណក្ខន្ធ ទេស សម្បត្តិ

ក្លិបភ្នំពេញក្រោន បានប្រកាសជាផ្លូវការអំពីការលើកពេលប្រកួតទល់នឹងក្រុម វិសាខា នៅក្នុងការប្រកួត ជើង​ទី​១ វគ្គពាក់កណ្តាលផ្តាច់ព្រ័ត្រពានរង្វាន់ សម្តេចអគ្គមហាសេនាបតីតេជោ ហ៊ុន សែន (Hun Sen Cup) ថ្ងៃទី ២៣ ខែ មេសា ស្អែកនេះ ដើម្បីជាការគោរពដល់ដួងវិញ្ញាណក្ខន្ធ​កីឡាករ ទេស សម្បត្តិ។

ទាក់ទងនឹងការលើកពេលនេះ ក្លិបភ្នំពេញក្រោន បានចេញសេចក្តីថ្លែងការណ៍ថា៖ «បន្ទាប់ពីបានទទួលដំណឹងអំពីការបាត់បង់ធនធានកីឡាករដ៏ល្អសម្រាប់ក្លិបបាល់ទាត់វិសាខាគឺកីឡាករ ទេស សម្បត្តិ យើងខ្ញុំទាំងអស់គ្នាពិតជាមានភាពតក់ស្លុតជាខ្លាំងនិងសូមចូលរួមរំលែកទុក្ខដ៏ក្រៀមក្រំជាមួយក្រុមគ្រួសារ និងញាតិមិត្តនៃសព។ នៅក្នុងស្ថានភាពដ៏សោកសៅនេះ យើងខ្ញុំសូមជម្រាបជូនសាធារណជនមេត្តាជ្រាបថា សម្រាប់ការប្រកួតរវាងក្រុមភ្នំពេញក្រោន និងវិសាខា ដែលគ្រោងនឹងធ្វើឡើងនៅថ្ងៃពុធ ទី២៣ ខែមេសានេះ នឹងត្រូវលើកពេលប្រកួតទៅថ្ងៃពុធ ទី៣០ ខែមេសា ឆ្នាំ២០២៥ ខាងមុខវិញ»។

ដូចដែលអ្នកគាំទ្រទាំងអស់បានជ្រាបហើយ ថាកាលពីថ្ងៃទី ២១ ខែ មេសា ម្សិលមិញ បាល់ទាត់កម្ពុជាទាំងមូល រួមទាំងគ្រួសាររបស់ ទេស សម្បត្តិ និងក្លិបវិសាខា បានជួបទុក្ខដ៏ក្រៀមក្រំ បន្ទាប់ពីកីឡាកររូបនេះ ដែលជាធនធានកីឡាករបាល់ទាត់ដ៏ល្អរបស់ កម្ពុជា បានទទួលមរណភាព ដោយសារគ្រោះថ្នាក់ចរាចរណ៍។

យ៉ាងណា ដើម្បីជាការចូលរួមរំលែកទុក្ខ និងគោរពវិញ្ញាណក្ខន្ធដល់ទេស សម្បត្តិ ភាគីក្លិបទាំង ២ បានឯកភាពគ្នាលើកពេលការប្រកួតថ្ងៃស្អែកនេះ និងប្តូរទៅប្រកួតនៅថ្ងៃទី ៣០ ខែ មេសា ជំនួសវិញ៕

អត្ថបទ៖ សេម កុសល