រដ្ឋាភិបាលចាស់របស់លោកនាយករដ្ឋមន្រ្តី ប្រាយុទ្ធ ចាន់អូចា បានដាក់ចេញយុទ្ធសាស្រ្តនេះឡើងជា ៥ ដំណាក់កាល ដោយរដ្ឋាភិបាលជួយចំណាយ ៤០ ភាគរយ លើថ្លៃបន្ទប់ស្នាក់នៅ ពេលធ្វើដំណើរកម្សាន្តសម្រាប់ភ្ញៀវទេសចរជាពលរដ្ឋថៃ។
ទេសចរណ៍ នៅតែជាកត្តាជំរុញដ៏សំខាន់សម្រាប់សេដ្ឋកិច្ចរបស់ថៃ ចំពេលដែលប្រទេសនេះត្រូវជួបនឹងការធ្លាក់ចុះនៃផលិតកម្ម និងបំណុលពិបាកទារខ្ពស់ ដែលរារាំងដល់កំណើន។ ក្រសួងហិរញ្ញវត្ថុរំពឹងថា ភ្ញៀវបរទេសចំនួន ៣៦ លាននាក់ នឹងចូលមកលេងថៃក្នុងឆ្នាំនេះ ដែលអាចឱ្យប្រទេសកើបប្រាក់ប្រមាណ ១,៦៩ ទ្រីលានបាត ដោយសារតែគោលនយោបាយផ្សេងៗ ជាពិសេសការលើកលែងទិដ្ឋាការ។
រដ្ឋាភិបាលថៃបានខិតខំប្រឹងប្រែងទាក់ទាញភ្ញៀវទេសចរ ដើម្បីជួយជំរុញកំណើនសេដ្ឋកិច្ចដែលកំពុងដើរអូសជើង ក្នុងមហិច្ឆតាទាក់ទាញភ្ញៀវបរទេសឱ្យបាន ៣៥ លាននាក់ក្នុងឆ្នាំនេះ។ ក្នុងជំហានចុងក្រោយដើម្បីសម្រេចគោលដៅនេះ ថៃកាលពីសប្ដាហ៍មុន បានពង្រីកបញ្ជីលើកលែងទិដ្ឋាការចំនួន ៦០ ថ្ងៃ សម្រាប់ប្រមាណ ៩៣ ប្រទេស។
ពិតណាស់ ផលប៉ះពាល់អាចត្រូវបានវាស់វែងក្នុងទម្រង់ផ្សេងៗ ហើយច្បាស់បំផុត គឺការផ្អែកលើទិន្នន័យភ្ញៀវទេសចរ ដែលរដ្ឋាភិបាលថៃកត់ត្រាប្រចាំថ្ងៃ។ អ្វីដែលគេដឹងភ្លាមៗនោះគឺថា ភាពរហ័សនៃព័ត៌មាន បង្កជាការព្រួយបារម្ភផ្សេងៗ ដែលនេះមានផលប៉ះពាល់ដោយផ្ទាល់លើកេរ្តិ៍ឈ្មោះរបស់ប្រទេសថៃ ដែលពឹងផ្អែកខ្លាំងលើវិស័យទេសចរណ៍សម្រាប់ដង្ហើមសេដ្ឋកិច្ច។