កំពូល លេបថប ទាំង ៥ កំពុងវាយលុកទីផ្សារពិភពលោក

រហូតមកដល់ពេលនេះកុំព្យូទ័រយួរដៃដែលយើងស្គាល់ថា លេបថប (Laptop) គឺជាឧបករណ៍ដ៏សំខាន់ និងមិនអាចខ្វះបានសម្រាប់បុគ្គលិកការិយាល័យ ក៏ដូចសិស្សនិស្សិតសម្រាប់ការសិក្សាស្រាវជ្រាវទៅតាមផ្នែកនីមួយៗរបស់ពួកគេ ។

បច្ចុប្បន្នមានម៉ាកលេបថបល្បីៗកំពុងប្រកួតប្រជែងគ្នាយ៉ាងខ្លាំង និងចេញស៊េរីថ្មីៗជាបន្តបន្ទាប់ ហើយនេះជាម៉ាកលេបថបល្បីៗលើលោកទាំង ៥ ដែលពេញនិយមបំផុត ៖

១. ក្រុមហ៊ុន Dell

ប្រសិនបើអ្នកនៅតែស្វែងរកកុំព្យូទ័រយួរដៃ Windows នោះ Dell ផ្តល់ជូននូវម៉ូដែលល្អបំផុតមួយចំនួន ។ ភាពធន់គឺជាលក្ខណៈពិសេសមួយដែលត្រូវបានគេសរសើរបំផុតរបស់ពួកគេ ហើយនេះជាហេតុផលមួយក្នុងចំណោមហេតុផលដែលពួកគេនៅតែមានការប្រកួតប្រជែងខ្លាំងនៅក្នុងទីផ្សារនាពេលបច្ចុប្បន្ននេះ ។

ប្រភេទ និងស៊េរីចំនួន ៣ របស់ពួកគេដែលធ្វើបានយ៉ាងល្អគឺ Alienware ដែលល្អសម្រាប់អ្នកលេងហ្គេម ម៉ូដែល Inspiron និង XPS ។

២. ក្រុមហ៊ុន Apple

Apple ត្រូវ​បាន​គេ​ចាត់​ទុក​ជា​ម៉ាក​យីហោ​ដ៏ប្រណិត​មួយ​នៅ​ពេល​យើង​និយាយ​អំពី​កុំព្យូទ័រ លេបថប ស្មាតហ្វូន និង​ថេប្លេត ។ ពួកគេបានវាយលុកទីផ្សារលេបថបកាលពីជាងមួយទសវត្សរ៍មុន ហើយម៉ូដែល Macs ថ្មីបំផុតទទួលការពេញនិយមយ៉ាងខ្លាំង ។

វាមិនមែនជាប្រភេទ Windows នោះទេ ហើយបន្ទះឈីប ARM M1 ខាងក្នុងថ្មីដែលបានកែលម្អត្រូវបានបង្កើតឡើងយ៉ាងរឹងមាំ ហើយប្រើប្រាស់បានយូរដោយមិនបង្កបញ្ហាដូចលេបថប Windows មួយចំនួនផ្សេងទៀត ។

៣. ក្រុមហ៊ុន Hewlett-Packard (HP)

ក្រុមហ៊ុនបច្ចេកវិទ្យារបស់អាមេរិកមួយទៀតគឺ Hewlett-Packard (HP) បានបង្ហាញខ្លួនជាលើកដំបូងនៅឆ្នាំ ១៩៣៩ នៅពេលដែលលោក Bill Hewlett និង Dave Packard បានបង្កើតឧបករណ៍បំពងសំឡេង ។ ពួកគេបានបោះជំហានទៅមុខក្នុងវិស័យឧស្សាហកម្មតាំងពីពេលនោះមក ហើយអស់រយៈពេលជាច្រើនឆ្នាំពួកគេជាអ្នកនាំមុខគេនៅក្នុងទីផ្សារកុំព្យូទ័រលើតុ (Desktop) និងម៉ាស៊ីនព្រីន ។

នៅឆ្នាំ ១៩៨៤ ពួកគេបានណែនាំលេបថបប្រភេទ HP-100 ដែលជាកុំព្យូទ័រយួរដៃដំបូងគេរបស់ពួកគេ ។ លេបថប​របស់​ពួក​គេ​ផ្តល់​ជូន​នូវ​រចនាបទ និង​មុខងារ​រួម​គ្នា ហើយភាគច្រើន​​ពួក​គេបង្កើតឡើងក្នុង​គោល​បំណង​សម្រាប់​អ្នក​ប្រើ​ប្រាស់​ក្នុង​ផ្ទះ និងនៅតាម​ការិយាល័យ​ជាដើម ។

៤. ក្រុមហ៊ុន Microsoft

ក្រុមហ៊ុនយក្សផលិត និងអភិវឌ្ឍទាំងផលិតផលផ្នែករឹង (Hardware) និងកម្មវិធី Licensed Software របស់អាមេរិក Microsoft គឺជាក្រុមហ៊ុនដែលប្រើប្រព័ន្ធប្រតិបត្តិការ Windows មានអាយុកាលជាច្រើនទសវត្សរ៍មកហើយ ប៉ុន្តែក្រុមហ៊ុន Microsoft គឺថ្មីសម្រាប់ទីផ្សារលេបថប ។ ពួកគេបានបង្ហាញខ្លួនជាលើកដំបូងរបស់ពួកគេក្នុងឆ្នាំ ២០១២ ជាមួយនឹងស៊េរី Surface Touch Screens ។

អេក្រង់ថាច់ស្គ្រីន (Touch Screens) និងការរចនារលោងល្អដ៏ប្រណិតរបស់ពួកគេត្រូវបានអតិថិជនចូលចិត្ត ក៏ដូចជាប្រព័ន្ធថាមពលថ្មដ៏ល្អ ។ ពួកគេទទួលបានកេរ្តិ៍ឈ្មោះក្នុងការនាំយកលេបថបល្អបំផុតមួយចំនួននៅលើទីផ្សារ ។

៥. ក្រុមហ៊ុន Asus

បំពាក់​ដោយ​សមត្ថភាព​គ្រប់​យ៉ាង​មិន​គួរ​ឲ្យ​ជឿ Asus ផ្តល់​ជូន​អតិថិជន​យ៉ាង​ល្អសម្រាប់ការសន្សំលុយកាក់ ។ Chromebooks និងលេបថបខ្នាតតូចរបស់ពួកគេគឺជាជម្រើសដែលងាយស្រួលប្រើបំផុតនៅលើទីផ្សារ ដែលធានាឲ្យពួកគេជាប់ចំណាត់ថ្នាក់កំពូលទាំង ៥ ។

Asus Zenbook 13 មានអេក្រង់កម្រិត 1080p ដ៏ល្អឥតខ្ចោះ ថាមពលថ្មបានយូរ រួមជាមួយនឹងលក្ខណៈពិសេសដ៏អស្ចារ្យផ្សេងទៀត ។ ការរចនារបស់វាមានភាពទាក់ទាញខ្លាំង ហើយវាងាយស្រួលសម្គាល់ខ្លួនវាពីគូប្រជែងដែលមានតម្លៃថ្លៃ និងខ្លាំងជាង ៕

ប្រែសម្រួលដោយ ៖ ជីវ័ន្ត

ប្រភព ៖ Luxatic

ចុចអាន ៖ ម៉ាកទូរស័ព្ទ ល្បីៗលើលោកទាំង ៥ មានអ្នកប្រើប្រាស់ច្រើនបំផុត