ឈប់ឈឺក្បាល រឿងក្រុមហ៊ុន​ទូរសព្ទ​ពូកែ​កាត់​លុយ​​ ប្រើលេខកូដ *1200# អាច​ផ្តាច់បាន​គ្រប់ប្រព័ន្ធទាំងអស់

ក្រសួងប្រៃសណីយ៍ និងទូរគមនាគមន៍ នៅថ្ងៃទី១១ ខែធ្នូ ឆ្នាំ២០២០នេះ បានចេញសេចក្តី​ជូនដំណឹង​ពីការដាក់ឲ្យ​ដំណើរការ​លេខ​កូដពិេសស​មួយ ដើម្បី​ផ្តាច់​សេវាកម្ម​ទូរសព្ទ​ផ្សេងៗ​មិន​ត្រូវការ ដែល​នាំ​ឲ្យ​កាត់​លុយ​ដោយ​មិន​បាន​ដឹង។

និយ័តករទូរគមនាគមន៍កម្ពុជា បាន​សហការជាមួយ​ប្រតិបត្តិករទូរសព្ទ​ចល័តទាំងអស់ ដាក់ឱ្យដំណើរការលេខកូដ*1200# ដែល​អ្នកប្រើប្រាស់អាចពិនិត្យនិងផ្តាច់រាល់សេវាបន្ថែមដែលមិន​ត្រូវ​ការ ចាប់ពីថ្ងៃទី១១ ខែធ្នូ ឆ្នាំ២០២០ តទៅ។

​បច្ចុប្បន្នប្រតិបត្តិករទូរសព្ទបានបែងចែកសេវាកម្មទូរសព្ទជាពីរប្រភេទគឺ៖

• សេវាទូរសព្ទចល័ត (Mobile Service) សំដៅដល់សេវាដែលប្រើប្រាស់ជាប្រចាំ សម្រាប់ការហៅទូរសព្ទ និងការប្រើអីុនធឺណិត រួមទាំងគម្រោងប្តូរប្រាក់ប្រចាំសប្តាហ៍ ឬប្រចាំខែ ជាដើម។
• សេវាឌីជីថល (Digital Service) សំដៅដល់សេវាបន្ថែមនានា ឬសេវាកម្មកំសាន្ត មានជាអាទិ៍ សេវាហោរាសាស្ត្រសេវាស្វែងរកការងារ សេវាបណ្តាញទំនាក់ទំនងសង្គម សេវាហ្គេម សេវា Missed Call Alert និង សេវា CallTune ជាដើម។ អ្នកប្រើប្រាស់ទូរសព្ទភាគច្រើន អាចមានជួបប្រទះបញ្ហាកាត់ទឹកប្រាក់ ដោយសារ «សេវាឌីជីថល»។
  ​

យ៉ាងណាមិញ ក្រសួង​បាន​ក្រើន​រំលឹកអ្នក​ប្រើ​ប្រាស់​ឲ្យ​ប្រុង​ប្រយ័ត្ន មុនពេលបញ្ចូលទឹកប្រាក់ដើម្បីភ្ជាប់គម្រោង ឬ សេវាកម្មណាមួយ គួរបិទអ៉ីនធឺណិតជាមុន ដើម្បីជៀសវាងការកាត់ទឹកប្រាក់ដោយសារការប្រើសេវាអ៉ីនធឺណិតជាដើម៕