ក្រុមហ៊ុន Microsoft បើកឲ្យប្រជាជន រុស្ស៊ី ទាញ យកប្រព័ន្ធប្រតិបត្តិការ Windows ឡើងវិញបាន

ក្រុមហ៊ុន Microsoft បានអនុញ្ញាតឲ្យពលរដ្ឋរុស្ស៊ីទាញយក និងដំឡើងប្រព័ន្ធប្រតិបត្តិការ Windows របស់ខ្លួន និងការអាប់ដេតឡើងវិញបាន បន្ទាប់ពីការផ្អាកកាលពីខែកញ្ញាកន្លងទៅ ។

នៅក្នុងខែកញ្ញា ក្រុមហ៊ុន Microsoft បានរឹតបន្តឹងអ្នកប្រើប្រាស់រុស្ស៊ីពីការអាប់ដេតកុំព្យូទ័ររបស់ពួកគេទៅ Version ចុងក្រោយបំផុតនៃប្រព័ន្ធប្រតិបត្តិការ Windows 11 ។ បន្ទាប់មក អ្នកប្រើប្រាស់ដែលកំពុងព្យាយាមទាញយកកំណែចុងក្រោយរបស់ Windows នៅលើគេហទំព័ររបស់ក្រុមហ៊ុន គឺមិនអាចប្រើបានឡើយ ។

បើយោងតាមរបាយការណ៍ Microsoft បានអនុញ្ញាតឲ្យប្រជាជនរុស្ស៊ីទាញយកការអាប់ដេតចុងក្រោយគេម្តងទៀតដោយគ្មានកម្មវិធី VPN ឡើយ ដែលឥឡូវនេះអ្នកប្រើប្រាស់អាចដំឡើងកំណែចុងក្រោយបំផុតនៃប្រព័ន្ធប្រតិបត្តិការ Windows 11 — 22H2 — ក៏ដូចជា Windows 10, Windows 8.1, និង Windows 7 ផងដែរ ។

គួរឲ្យដឹងថា កាលពីថ្ងៃទី ៤ ខែមីនា ក្រុមហ៊ុន Microsoft បានប្រកាសពីការផ្អាកប្រតិបត្តិការនៅក្នុងប្រទេសរុស្ស៊ី រួមទាំងការលក់ផលិតផល និងសេវាកម្មថ្មីរបស់ Microsoft ប្រឆាំងនឹងប្រតិបត្តិការយោធាពិសេសរបស់រុស្ស៊ីនៅអ៊ុយក្រែន ។ ប៉ុន្តែ ទោះជាយ៉ាងណាក៏ដោយក្រុមហ៊ុននិយាយថា នឹងបន្តបំពេញកាតព្វកិច្ចដែលមានស្រាប់ដល់អតិថិជននៅក្នុងប្រទេសរុស្ស៊ី ៕​

ប្រែសម្រួលដោយ៖ រតនៈ

ប្រភព ៖ Sputnik