ទូរស័ព្ទតម្លៃកប់ៗក្រុមហ៊ុនធំ២ បន្តធ្លាក់ថ្លៃ ខណៈស៊េរីថ្មីត្រៀមបង្ហាញខ្លួន និងមួយទៀតទើបចេញ

ក្នុងចំណោមទូរស័ព្ទតម្លៃកប់ៗរបស់ក្រុមហ៊ុនម៉ាកធំៗនៅកម្ពុជា រួមមាន s23 Ultra របស់ក្រុមហ៊ុន Samsung; iPhone 14 Pro Max របស់ក្រុមហ៊ុន iPhone; Oppo find X របស់ក្រុមហ៊ុន Oppo​​ និងទូរស័ព្ទកម្រិតខ្ពស់ របស់ក្រុមហ៊ុនទូរស័ព្ទដទៃផ្សេងទៀត កំពុងទម្លាក់តម្លៃ​របស់ខ្លួន​ជាបន្តបន្ទាប់នៅតាមហាងទូរស័ព្ទនីមួយៗ។

ក្នុងចំណោមទូរស័ព្ទតម្លៃកប់ៗទាំងនោះ កម្ពុជាថ្មីសូមលើកយកតែម៉ាកល្បីរបស់កូរ៉េ និងអាមេរិកប៉ុណ្ណោះ រួមមាន Samsung និង iPhone ដែលត្រូវបានគេដឹងថា ជាក្រុមហ៊ុនម៉ាកល្បីខាងផលិតផលបច្ចេកវិទ្យា ពិសេសផ្តោតលើទូរស័ព្ទដៃ ដោយមានការប្រកួតប្រជែងគ្នាខ្លាំងបំផុត។

ជាទូទៅ តម្លៃដែលដាក់ចេញពីក្រុមហ៊ុនទូរស័ព្ទដៃគឺខុសគ្នាពីតម្លៃដាក់លក់ទីផ្សារ ក៏ព្រោះតែត្រូវបញ្ចូលសេវាពន្ធ​​ផ្សេងៗ ហេតុនេះ តម្លៃនៃការនាំចូលយកមកលក់បន្តតាមដេប៉ូលក់ទូរស័ព្ទដៃ ក៏ខុសៗគ្នាតិចតួចទៅតាមនោះដែរ តែជាមធ្យម អាចលើសតម្លៃដើមក្រុមហ៊ុន ជាង១០០ដុល្លារ ទៅ ២០០ដុល្លារ (សម្រាប់ការលក់លើទីផ្សារកម្ពុជា)។

យ៉ាងណាមិញ ខណៈពេលដែលម៉ូឌែលថ្មីដែលទើបនឹងចេញ និងមួយទៀតត្រៀមបង្ហាញខ្លួន នៅតាមដេប៉ូ ​និងក្រុមហ៊ុនចែកចាយទូរស័ព្ទ ចាប់ផ្តើមទម្លាក់តម្លៃប្រហែលជាង ៣០% នៃតម្លៃលក់ដើមឯណោះ។ ឯការលក់ គឺកំណត់តាមកន្លែងលក់ទូរស័ព្ទទាំងនោះ ដោយម៉ូឌែលខ្លះ ចេញភ្លាមលក់ក្នុងតម្លៃជាង​ ១១០០ដុល្លារ ទៅជិត ២ពាន់ដុល្លារ (តាមប្រភេទទំហំGB) មកនៅត្រឹមជាង ១ពាន់ដុល្លារ ឡើងទៅ ហើយគេរំពឹងថា អាចនឹងបន្តធ្លាក់ថ្លៃបន្ថែមទៀត ពិសេសក្រោយថ្ងៃចេញម៉ូឌែលថ្មីរបស់ក្រុមហ៊ុន Apple តែម្តង។

១. iPhone 14 Pro Max
ម៉ូឌែលនេះ ជាទូរស័ព្ទដែលមានសមត្ថភាពខ្លាំងបំផុតរបស់ Apple ដោយបំពាក់បច្ចេកវិទ្យាទំនើបៗ ទាំងអេក្រង់ដែលមាន​កាមេរ៉ា​ទំលុះអេក្រង់ ឯកម្លាំងម៉ាស៊ីនវិញក៏ខ្លាំង មានដាក់បន្ទះឈីប A16 Bionic ខ្នាត 4nm និងចំណុចពិសេសៗជាច្រើនទៀត។ iPhone 14 Pro Max បានចេញលក់លើទីផ្សារនៅអំឡុងខែកញ្ញា​​ ឆ្នាំ២០២២ ដោយដាក់លក់នៅតាមដេប៉ូលក់ ក្នុងតម្លៃប្រហាក់ប្រហែលគ្នាប្រមាណជាង ១៥០០ដុល្លារ ។

ប៉ុន្តែឥលូវនេះ iPhone 14 Pro Max នៅសល់តម្លៃចន្លោះជាង ១០០០ដុល្លារស្តើងប៉ុណ្ណោះ ដោយផ្អែកតាមការដាក់លក់​របស់ដេប៉ូលក់ទូរស័ព្ទដៃ ទៅតាមកម្មវិធីផ្តល់ជូនពិសេសរបស់ហាងនីមួយៗ ក្នុងតម្លៃខុសៗគ្នា។ ជាក់ស្តែង បើតាមតម្លៃ iPhone 14 Pro Max នៅហាងទូរស័ព្ទ​នីកា គឺនៅសល់ត្រឹម $1070 – $1170។

២. s23 Ultra
សម្រាប់អ្នកនិយមដេញស៊េរីទូរស័ព្ទ​ ប្រាកដជាស្គាល់ច្បាស់នូវ​សមត្ថភាពរបស់វា ព្រោះម៉ូឌែលមួយនេះជា​ទូរស័ព្ទ​ Flagship កម្រិតកំពូលរបស់ក្រុមហ៊ុន Samsung ដោយបំពាក់មកជាមួយ​ Hardware ទំនេីបខ្ពស់ៗ​ ពិសេស​កម្លាំងម៉ាស៊ីន​ខ្លាំងកប់​ Qualcomm Snapdragon 8 Gen2 For Galaxy ដែលជាការផលិតពិសេស សម្រាប់​ s23 Ultra ។

s23 Ultra បានចេញលក់លើទីផ្សារនៅអំឡុងខែកុម្ភៈ ឆ្នាំ២០២៣ ក្នុងតម្លៃប្រហែលជាង​ ១៤០០ដុល្លារ តែឥលូវ ស្មាតហ្វូនម៉ូឌែលនេះ នៅសល់តម្លៃចន្លោះជាង ១០០០ដុល្លារស្តើង ឬក្រោមនេះប៉ុណ្ណោះ បន្ទាប់ពីម៉ូឌែលកប់មួយទៀតរបស់ក្រុមហ៊ុននេះ Galaxy Z Fold5 បានបញ្ចេញនៅក្នុងខែសីហា ឆ្នាំ២០២៣។