ជប៉ុន ផលិតមនុស្សយន្ត​តម្លៃ ៣ លានដុល្លារចេញ​ពីពិភពគំនូរជីវចល

ក្រុមហ៊ុន Tsubame Industries នៅទីក្រុងតូក្យូ បានបង្កើតមនុស្សយន្តកង់ ៤ កម្ពស់ ៤ ម៉ែត្រកន្លះ ដែលមានលក្ខណៈដូចជា “Mobile Suit Gundam” ពីស៊េរីគំនូរជីវចលជប៉ុនដ៏ពេញនិយម ហើយមានតម្លៃដល់ទៅ ៣ លានដុល្លារ ។

មនុស្សយន្ត​នេះ ហៅថា ARCHAX មានទម្ងន់ ៣.៥ តោន ហើយផ្នែកខាងក្រៅ​របស់វា​មានភ្ជាប់ដោយកាមេរ៉ាបញ្ជូនរូបភាពទៅកាន់ម៉ូនីទ័រកាប៊ីនខាងក្នុង ជាពិសេសវាត្រូវបានបញ្ជាដោយដៃ ​Joystick ពីខាងក្នុងមនុស្សយន្តផ្ទាល់តែម្តង ។

អ្វីដែលកាន់តែពិសេសទៀតនោះ មនុស្សយន្តនេះអាចប្រែកាយទៅជាឡាន​ ហើយអាចបើកបរបានចម្ងាយដល់ទៅ ១០ គីឡូម៉ែត្រក្នុងមួយម៉ោង ខណៈវាក៏នឹងត្រូវដាក់តាំងបង្ហាញក្នុងកម្មវិធី Japan Mobility Show នៅចុងខែនេះផងដែរ ។

តាមរយៈលោក Ryo Yoshida នាយកប្រតិបត្តិនៃក្រុមហ៊ុន Tsubame Industries វ័យ ២៥ ឆ្នាំបាននិយាយថា ជប៉ុនពិតជាពូកែខាងគំនូរជីវចល ហ្គេម មនុស្សយន្ត និងរថយន្ត ។ មិនតែ​ប៉ុណ្ណោះ លោកគ្រោងនឹងផលិតមនុស្សយន្តបន្ថែមចំនួន ៥ គ្រឿងទៀតផងដែរ ដោយសង្ឃឹមថា វាអាចត្រូវបានប្រើប្រាស់សម្រាប់ការជួយសង្គ្រោះគ្រោះមហន្តរាយ ឬនៅក្នុងឧស្សាហកម្មអវកាស ៕

ប្រែសម្រួល៖ នាង រតនៈ

ប្រភព៖​ CNA