សូមប្រុងប្រយ័ត្ន! ទម្រង់ឆបោកដែលអាចឈានដល់ការគ្រប់គ្រងគណនី ABA របស់អ្នក

បច្ចុប្បន្ន បច្ចេកវិទ្យាកាន់តែមានភាពជឿនលឿន និងរីកចម្រើនយ៉ាងឆាប់រហ័ស ដែលផ្តល់ភាពងាយស្រួលទៅដល់អ្នកប្រើប្រាស់។ ទន្ទឹមនឹងភាពរីកចម្រើនផ្នែកបច្ចេកវិទ្យានេះ ក៏បង្កឱ្យមានផលប៉ះពាល់ដល់អ្នកប្រើប្រាស់ផងដែរ តាមរយៈការឆបោកបញ្ឆោតតាមទម្រង់ផ្សេងៗជាច្រើន។ ជាក់ស្តែងថ្មីៗនេះ មានទម្រង់ឆបោកបញ្ឆោតតាមរយៈសារ (SMS Phishing) ដែលអាចឈានដល់ការគ្រប់គ្រងគណនី ធនាគារ ABA របស់អ្នក។

កន្លងមក នាយកដ្ឋានប្រឆាំងបទល្មើសបច្ចេកវិទ្យា បានជូនដំណឹងអំពីករណីឆបោកបញ្ឆោតជាច្រើនតាមប្រព័ន្ធអនឡាញ ហើយថ្មីៗនេះ ក៏បានជូនដំណឹងអំពីទម្រង់ឆបោកបញ្ឆោតតាមរយៈសារ (SMS Phishing) ដើម្បីឱ្យអ្នកប្រើប្រាស់ប្រព័ន្ធបច្ចេកវិទ្យាទាំងអស់មានការប្រុងប្រយ័ត្ន។ តាមរយៈការជូនដំណឹងនេះ នាយកដ្ឋានប្រឆាំងបទល្មើសបច្ចេកវិទ្យា បានបញ្ជាក់ថា៖ «សូមប្រុងប្រយ័ត្ន! Scam Alert! សូមកុំចុចតំណរភ្ជាប់ក្លែងក្លាយ (Phishing Link) នេះគឺជាទម្រង់បោកប្រាស់ ដែលបន្លំខ្លួនជាធនាគារ ABA បញ្ឆោតឱ្យចុចតំណភ្ជាប់ណាមួយ ហើយលួចយកនូវព័ត៌មានរបស់យើង និងឈានទៅដល់ការគ្រប់គ្រងគណនី ធនាគារ ABA»។ ដូច្នេះ ដើម្បីសុវត្ថិភាព សូមលោកអ្នក កុំចុចលើតំណភ្ជាប់ណាមួយដែលមិនមានប្រភពច្បាស់លាស់ ដែលតម្រូវឱ្យបំពេញនូវព័ត៌មានផ្ទាល់ខ្លួនឱ្យសោះ។

យ៉ាងណាមិញ អ្នកប្រើប្រាស់អ៊ីនធឺណិតទាំងអស់ គួរតែប្រុងប្រយ័ត្នឱ្យបានខ្ពស់ចំពោះការប្រើប្រាស់នូវប្រព័ន្ធបច្ចេកវិទ្យា ជាពិសេស នៅពេលដែលមានការផ្ញើសារ ឬតំណរភ្ជាប់ផ្សេងៗតាមរូបភាពជាច្រើន សូមកុំព្យាយាមចុចចូលឱ្យសោះ ព្រោះអាចនាំឱ្យជនអនាមិកទទួលបានព័ត៌មានផ្ទាល់ខ្លួនរបស់អ្នក៕