ត្រូវធ្វើបច្ចុប្បន្នភាព Mobile App ជាប្រចាំ ដើម្បីធានាសុវត្ថិភាពលើប្រព័ន្ធការពារទូរសព្ទដៃ កាន់តែរឹងមាំ

ម្ចាស់ទូរសព្ទដៃមួយចំនួន មិនសូវជាអើពើនឹងការធ្វើកំណែថ្មីរបស់ប្រព័ន្ធប្រតិបត្តិការ កម្មវិធីទូរសព្ទដៃ (Mobile APP) ប៉ុន្មានឡើយ ក៏ព្រោះតែយល់ថាវាមិនសូវសំខាន់។ តួយ៉ាង ភាគច្រើននៃកម្មវិធីដែលយើងប្រើជាញឹកញាប់ដូចជា តេឡេក្រាម ហ្វេសប៊ុក ពិសេសកម្មវិធីធនាគារជាដើម ដែលតែងមានការទាមទារឱ្យធ្វើកំណែជាញឹកញាប់ ខណៈអ្នកខ្លះយល់ថា ជាការរំខានទៅវិញ។

យ៉ាងណាមិញ ចំពោះការធ្វើកំណែចុងក្រោយ មិនថាតែប្រព័ន្ធប្រតិបត្តិការទូរសព្ទ ឬកម្មវិធីទូរសព្ទ តម្រូវឱ្យមានការអាប់ដេតជាប្រចាំ ដើម្បីកែលម្អដំណើរការឱ្យកាន់តែប្រសើរជាងមុន។

ជារឿយៗ កម្មវិធីធនាគារតាមប្រព័ន្ធអនឡាញ គឺតែងទាមទារឱ្យមានការធ្វើបច្ចុប្បន្នភាពជាច្រើនលើក និងញឹកញាប់ជាងកម្មវិធីផ្សេង មិនត្រឹមតែដើម្បីដោះស្រាយបញ្ហាកំហុស និងកែលម្អដំណើរការឱ្យកាន់តែប្រសើរជាងមុនប៉ុណ្ណោះទេ អ្វីដែលសំខាន់ គឺបន្ថែមមុខងារសុវត្ថិភាពថ្មីសម្រាប់ការប្រើប្រាស់។

ហេតុនេះ ល្អបំផុត ត្រូវប្រាកដថាទូរសព្ទដែលលោកអ្នកកំពុងប្រើប្រាស់ ទាំងប្រព័ន្ធប្រតិបត្តិការ កម្មវិធីរុករកតាមអ៉ីនធឺណិត និងកម្មវិធីផ្សេងទៀត ត្រូវបានធ្វើបច្ចុប្បន្នភាពជាប្រចាំ ក៏ព្រោះតែការអាប់ដេតជាញឹកញាប់ អាចពង្រឹងលើសុវត្ថិភាពនៃការប្រាស់ មិនអាចឱ្យពួក Hacker ប៉ះពាល់ដល់ទិន្នន័យ ឬចូលមកគ្រប់គ្រងទូរសព្ទដៃរបស់យើងបាន៕