ព័ត៌មានអន្ដរជាតិ

កម្មវិធី TikTok ផ្អាកនៅអាមេរិក មុនត្រាំស្បថចូលកាន់តំណែង

បានផុស

១ សប្តាហ៍ មុន

នៅ

ថ្ងៃអាទិត្យ ១៩ មករា ២០២៥

ដោយ

កម្មវិធីថ្នាលបណ្តាញទំនាក់ទំនងសង្គម TikTok ដែលអាជ្ញាធរសហរដ្ឋអាមេរិកបានចោទថាជាកម្មវិធីរបស់ចិន និងព្រួយបារម្ភចំពោះបញ្ហាសន្តិសុខជាតិ ព្រមទាំងរកលេសបិទជាយូរមកហើយនោះ បានងងឹតសូន្យឈឹងនៅក្នុងសហរដ្ឋ អាមេរិកកាលពីយប់ថ្ងៃសៅរ៍ នៅមុនពេលលោក ដូណាល់ ត្រាំ ស្បថចូលកាន់អំណាចនៅថ្ងអាទិត្យ។

កម្មវិធី TikTok ត្រូវផ្អាកបណ្តោះអាសន្ននៅអាមេរិករហូតដល់ត្រាំចូលកាន់អំណាច។CNN

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម CNN ការបើកលែងចេញរបស់កម្មវិធីបណ្តាញសង្គម TikTok បានកើតឡើងតិចជាងពីរម៉ោងមុនពេលការហាមប្រាមត្រូវបានគ្រោងនឹងចូលជាធរមាន។ តាមខ្លឹមសារដែលបានចុះផ្សាយក្នុងព័ត៌មានទាន់ហេតុការណ៍ (Breaking News) អ្នកចូលមើលកម្មវិធីត្រូវបានស្វាគមន៍ដោយសារអានថា «សូមទោស TikTok មិនមានទៀតទេចាប់ពីពេលនេះ។ ច្បាប់ហាមប្រាម TikTok ត្រូវបានអនុម័តនៅក្នុងសហរដ្ឋអាមេរិកនិងចូលជាធរមាន។ ជាអកុសលដ៏អាក្រក់ ចាប់ពីពេលនេះ អ្នកនិយមលេង និង ប្រើប្រាស់កម្មវិធី TikTok នឹងបាត់បង់ខានបានលេងទៀតហើយ។

កម្មវិធីបណ្តាញសង្គម TikTok បានប្រែក្លាយជាងងឹតលែងដំណើរការនៅក្នុងសហរដ្ឋអាមេរិកនៅថ្ងៃអាទិត្យបន្ទាប់ពីតុលាការកំពូលបានតម្កល់ការហាមឃាត់លើវេទិកាប្រព័ន្ធផ្សព្វផ្សាយសង្គមដែលរងការចោទថាគ្រប់គ្រងដោយចិន ប៉ុន្តែវាអាចត្រលប់មកវិញនៅដើមថ្ងៃចន្ទ។

កាលពីល្ងាចថ្ងៃសៅរ៍ TikTok បានចាប់ផ្តើមបង្ហាញសារដោយអានថា៖«យើងសោកស្តាយដែលច្បាប់របស់សហរដ្ឋអាមេរិកដែលហាមប្រាម TikTok នឹងចូលជាធរមាននៅថ្ងៃទី១៩ខែមករា ហើយបង្ខំឱ្យយើងធ្វើឱ្យសេវាកម្មរបស់យើងមិនអាចប្រើបានជាបណ្តោះអាសន្ន។ យើងកំពុងធ្វើការដើម្បីស្ថាបនាសេវាកម្មរបស់យើងនៅក្នុងសហរដ្ឋអាមេរិកឱ្យបានឆាប់តាមដែលអាចធ្វើទៅបាន ហើយយើងសូមថ្លែងអំណរគុណចំពោះការគាំទ្ររបស់អ្នក។ សូមរង់ចាំតាមដានបន្តទៀត»។

ការជូនដំណឹងនេះបានធ្វើឡើងប៉ុន្មានម៉ោង មុនពេលបម្រាមនេះត្រូវបានកំណត់ចូលជាធរមាន។ ប៉ុន្តែតើការហាមប្រាមនេះនឹងមានរយៈពេលប៉ុន្មានជាសំណួរបន្ទាប់ពីប្រធានាធិបតីជាប់ឆ្នោត ដូណាល់ ត្រាំ បាននិយាយថាគាត់នឹង «ទំនងជា» ពន្យារពេលការហាមឃាត់នៅលើ TikTok រយៈពេល៩០ថ្ងៃ បន្ទាប់ពីគាត់ចូលកាន់តំណែងនៅថ្ងៃចន្ទស្អែកនេះ ដោយបន្ថែមថា គាត់មិនបានធ្វើការសម្រេចចិត្តចុងក្រោយនៅក្នុងការហៅតាមទូរស័ព្ទក្នុងបទសម្ភាសន៍ជាមួយ NBC News នៅថ្ងៃសៅរ៍នោះទេ។

តាមសេចក្តីរាយការណ៍កន្លងមកប៉ុន្មានថ្ងៃនេះ នាយកប្រតិបត្តិក្រុមហ៊ុនបណ្តាញសង្គមដ៏ពេញនិយម TikTok នេះក៏ត្រូវបានអញ្ជើញឲ្យទៅចូលកម្មវិធីស្បថចូលកាន់អំណាចរបស់លោក ដូណាល់ ត្រាំ នៅថ្ងៃចន្ទទី២០មករាដែរ៕

ដោយ រ៉ាន់ រើយ