ចរាចរណ៍

ប្រញាប់ចូលធ្វើការ សន្តិសុខម្នាក់បើកបរម៉ូតូបុកដើមឈើស្លាប់

បានផុស

៣ years មុន

នៅ

ថ្ងៃពុធ ២១ មេសា ២០២១

ដោយ

កោះកុង ៖ បុរសវ័យ៥២ឆ្នាំម្នាក់ ព្រោះតែដល់ម៉ោងចូលបម្រើការងារជាសន្តិសុខនៅកាស៊ីណូ ក្បែរព្រំដែនចាំយាម បើកបរម៉ូតូលឿនពេកជ្រុលទៅបុកដើមឈើស្លាប់ខ្លួនឯងនៅនឹងកន្លែង។

លោក ជា សារិន អធិការនគរបាលស្រុកមណ្ឌលសីមា ឱ្យដឹងនៅរសៀលថ្ងៃទី២១ មេសាថា ជនរងគ្រោះឈ្មោះ ឈុន លី អាយុ៥២ឆ្នាំ មុខរបរជាកងសន្តិសុខក្រុមហ៊ុនLYP Group ទីលំនៅបច្ចុប្បន្ននៅភូមិ២ ឃុំប៉ាក់ខ្លង ស្រុកមណ្ឌលសីមា ខេត្តកោះកុង។

លោកអធិការនគរបាលស្រុកមណ្ឌលសីមា ប្រាប់ពីមូលហេតុដែលបណ្តាលឲ្យបុរសម្នាក់នេះស្លាប់នៅនឹងកន្លែង ក៏ព្រោះតែរូបគាត់ដល់ម៉ោងចូលបម្រើការងារ ទើបបើកបរក្នុងល្បឿនលឿនខ្វះការប្រុងប្រយ័ត្នជ្រុលទៅបុកដើមឈើកាលពីវេលាម៉ោង៦.០០នាទីព្រឹក នៅចំនុចបណ្តោយផ្លូវមួយកន្លែងក្នុងភូមិ៣ ឃុំប៉ាក់ខ្លង។ ក្រោយធ្វើកំណត់ហេតុរួច កម្លាំងជំនាញបានប្រគល់សពទៅឲ្យក្រុមគ្រួសារដើម្បីយកទៅធ្វើបុណ្យតាមប្រពៃណី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអធិការ ថ្លែងដែរថា បញ្ហាគ្រោះថ្នាក់ចរាចរណ៍ កងកម្លាំងនគរបាលស្រុកមណ្ឌលសីមា តែងចុះអនុវត្តរឹតបន្តឹងច្បាប់ស្តីពីចរាចរណ៍ផ្លូវគោកជារៀងរាល់ព្រឹកទៅតាមគោលដៅនីមួយៗ មានទាំងការអប់រំណែនាំ និងការផាកពិន័យចំពោះបុគ្គលដែលល្មើសគោរពច្បាប់បានត្រឹមត្រូវ។

ទោះយ៉ាងណា ពលរដ្ឋ ជាពិសេសកម្មករ កម្មការិនី នៅតែបំពានមើលស្រាលអាយុជីវិតរបស់ខ្លួន ខ្លះមិនពាក់មួកសុវត្ថិភាព បើកបរហួសល្បឿនកំណត់ វ៉ាជែងគ្នាក្នុងស្ថានភាពគ្រោះថ្នាក់ និងដឹកជញ្ជូនលើសកំណត់ទម្ងន់ជាដើម៕

អត្ថបទ ៖ សិរីវឌ្ឍនៈ