ចរាចរណ៍

ម៉ូតូអស់សាំងនាំគ្នាចុះបណ្ដើរត្រូវរថយន្ដបុកពីក្រោយស្លាប់ពីរនាក់

បានផុស

៤ years មុន

នៅ

ថ្ងៃសុក្រ ៣០ មេសា ២០២១

ដោយ

បុរស២នាក់ស្លាប់នៅកន្លែងហេតុ ក្រោយពីទៅឆ្លុះកង្កែបពេលត្រឡប់មកផ្ទះវិញបណ្តើរម៉ូតូអស់សាំងតាមផ្លូវត្រូវរថយន្តបុកស្លាប់នៅវេលាម៉ោង៥និង២០នាទីព្រឹក ថ្ងៃទី ៣០ ខែមេសា ឆ្នាំ២០២១ នៅលើកំណាត់ផ្លូវជាតិលេខ៥ ត្រង់ចំណុចខាងលិចស្ថានីយ៏ថ្លឹងរថយន្តកូនដំរី ប្រហែល១៥០ម៉ែត្រ ស្ថិតក្នុងភូមិកូនដំរី សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នគរបាលចរាចរណ៍ក្រុងប៉ោយប៉ែត បានឲ្យដឹងថា ជនរងគ្រោះដែលស្លាប់ ១ឈ្មោះ អៀង ម៉េងលី ភេទប្រុសអាយុ២៧ឆ្នាំ មុខរបរធ្វើស្រែ ជាអ្នកបណ្តើរម៉ូតូ ។ ២ឈ្មោះ អាង ធឿន ភេទប្រុស អាយុ៣៦ឆ្នាំមុខរបរធ្វើស្រែ អ្នកដើរពីក្រោយជួយរុញម៉ូតូ។ ជនរងគ្រោះទាំង២នាក់រស់នៅក្នុងភូមិកូនដំរីសង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។

នគរបាលចរាចរណ៍ក្រុងប៉ោយប៉ែតបានបញ្ជាក់ឲ្យដឹងបន្តទៀតថា នៅមុនពេលកើតហេតុ ជនរងគ្រោះមានគ្នាចំនួន៣នាក់ បានជិះម៉ូតូ១គ្រឿងម៉ាកហុងដាវ៉េវ ពណ៍ក្រហម ពុំមានស្លាកលេខ ទៅឆ្លុះកង្កែប លុះពេលនាំគ្នាត្រឡប់មកផ្ទះវិញ ជិះមកដល់លើផ្លូវជាតិម៉ូតូអស់សាំង ក្នុងនោះមាន១នាក់បានដើរទៅរកទិញសាំង និងជនរងគ្រោះ២នាក់ ជាអ្នកបណ្តើរម៉ូតូ ដោយម្នាក់ជាអ្នករុញពីក្រោយពី។ ពេលមកដល់ចំណុចកើតហេតុមានរថយន្ត១គ្រឿងម៉ាកតូយូតាស៊ីណា ពណ៍ប្រផេះ ពាក់ស្លាកលេខភ្នំពេញ 2T-2327 បើករេចង្កូតទៅបុកជនរងគ្រោះដែលកំពុងដើរបណ្តើរម៉ូតូ ពីក្រោយប៉ើងខ្ទាតធ្លាក់ពីថ្នល់ទាំងមនុស្សនិងម៉ូតូបណ្តាលឲ្យស្លាប់ទាំង២នាក់។ ចំណែករថយន្តបង្ក ក្រោយពីកើតហេតុ ម្ចាស់រថយន្តបានដោះស្លាកលេខរត់គេចខ្លួនបាត់ ។

សពត្រូវបានក្រុមគ្រួសារយកទៅចាត់ចែងធ្វើបុណ្យតាមប្រពៃណី ចំណែកអ្នកបើករថយន្តកម្លាំងនគរបាលជំនាញកំពុងធ្វើការស្រាវជ្រាវបាប់ យកមកទទួលខុសត្រូវនឡចំពោះមុខច្បាប់ ម៉ូតូនិងរថយន្តយកមករក្សាទុកនៅអធិការដ្ឋាននគរបាលក្រុងប៉ោយប៉ែតដើម្បីដោះស្រាយនៅពេលក្រោយ៕

អត្ថបទ ៖ វ៉ាន់ ណាង