គ្រាន់តែ​បើក​ឲ្យ​ធ្វើ​ដំណើរ​វិញ ​មួយ​ថ្ងៃ​ម្សិលមិញ​ ឆក់​ជីវិត​មនុស្ស ៧ នាក់​លើ​ដងផ្លូវ

តាមរបាយការណ៍របស់អគ្គស្នងការនគរបាលជាតិបានឲ្យដឹងថា នៅថ្ងៃអាទិត្យ ទី០៩ ខែឧសភា ម្សិលមិញនេះ មានករណីគ្រោះថ្នាក់ចរាចរណ៍ចំនួន១២លើក ក្នុងនោះធ្វើឲ្យមនុស្សស្លាប់ចំនួន០៧ នាក់ របួសចំនួន១៣ នាក់ ក្នុងនោះរបួសធ្ងន់ចំនួន១០នាក់ ដែលករណីគ្រោះថ្នាក់ចរាចរណ៍នេះ បានកើតឡើងនៅតាមរាជធានី ខេត្ត ចំនួន០៩។

ចំណែករយៈពេល១២៩ ថ្ងៃ ដោយគិតចាប់ពីថ្ងៃទី០១ ខែមករា ដល់ថ្ងៃទី០៩ ខែឧសភា ឆ្នាំ២០២១នេះ មានករណីគ្រោះថ្នាក់ចរាចរណ៍កើតឡើងចំនួន៩៥១ លើក ធ្វើឲ្យមនុស្សស្លាប់ចំនួន៥៤៣នាក់ របួសចំនួន១៣២៨ នាក់ របួសធ្ងន់ចំនួន៧៨៣នាក់ ហើយរយៈពេល១២៩ ថ្ងៃនេះដែរ មានយានយន្តល្មើសចំនួន៧៧៥៩៦គ្រឿង ត្រូវបានពិនិត្យ និងពិន័យ។ ក្នុងនោះ ម៉ូតូចំនួន៥៦៨៤៧ គ្រឿង និងរថយន្តគ្រប់ប្រភេទចំនួន២០៧៤៩ គ្រឿង ក្នុងនោះរថយន្តតូចចំនួន១៦១៤៣ គ្រឿង និងរថយន្តធំចំនួន៤៦០៦ គ្រឿង។

ទាក់ទងករណីនេះ លោកឧត្តមសេនីយ៏ឯក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានឲ្យដឹងដែរថា សម្រាប់ថ្ងៃទី០៩ ខែឧសភានេះដែរ នគរបាលចរាចរណ៏ទូទាំងប្រទេសបានត្រួតពិនិត្យ និងផាកពិន័យយានយន្តសរុបចំនួន៣០៨ គ្រឿង ក្នុងនោះមានម៉ូតូចំនួន១៦៨ គ្រឿង និងរថយន្តគ្រប់ប្រភេទចំនួន១៤០ គ្រឿង។ ក្នុងចំណោមម៉ូតូល្មើសទាំង១៦៨ គ្រឿងនោះ បើកបរដោយអត់មួកសុវត្ថិភាពចំនួន១៦៣ នាក់, បើកបរល្មើសសញ្ញាចំនួន០១ គ្រឿង,បើកបរដោយអត់ស្លាកលេខចំនួន០២ គ្រឿង និងបើកបរប្រើទូរស័ព្ទចំនួន០២ នាក់។

ចំណែករថយន្តទាំង១៤០ គ្រឿងនោះ មានរថយន្តតូចចំនួន៩១ គ្រឿង និងរថយន្តធំចំនួន៤៩ គ្រឿង ហើយក្នុងចំណោមយានយន្តទាំងនោះ មានល្មើសល្បឿនចំនួន១៩ គ្រឿង, អត់មានប័ណ្ណបើកបរចំនួន០៨ នាក់, អត់ខ្សែក្រវ៉ាត់ចំនួន៨៧ នាក់, លើសចំណុះចំនួន០៦ គ្រឿង, អត់ស្លាកលេខចំនួន០៥ គ្រឿង, បើកបរប្រើទូរសព្ទចំនួន១១ នាក់, អត់ឆៀក០២ នាក់ និងអាជីវកម្មចំនួន០២ គ្រឿង៕

កោះកែវ