ចរាចរណ៍

រថយន្តដឹកទំនិញ១គ្រឿង ក្រឡាប់នៅចំណោតតាតៃស្រុកកោះកុង

បានផុស

៤ years មុន

នៅ

ថ្ងៃសៅរ៍ ១៥ ឧសភា ២០២១

ដោយ

រថយន្តដឹកទំនិញចុះចំណោតតាតៃ តាមបណ្តោយផ្លូវជាតិលេខ៤៨ក្នុងល្បឿនលឿនរេចង្កូតក្រឡាប់បង្កឱ្យអ្នកបើកបររបួសធ្ងន់ ហើយត្រូវបញ្ចូនសង្គ្រោះនៅមន្ទីរពេទ្យខេត្តភ្លាមៗ។

បើតាមសមត្ថកិច្ចនគរបាលឱ្យដឹងថា ករណីគ្រោះថ្នាក់ចរាចរណ៍នេះកើតឡើងនៅវេលាម៉ោង៩ព្រឹកថ្ងៃទី១៥ ខែឧសភា ឆ្នាំ២០២១ ចំណុចគីឡូម៉ែត្រលេខ១២៨-១២៩ ស្ថិតនៅភូមិអន្លង់វ៉ាក់ ឃុំតាតៃក្រោម ស្រុកកោះកុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នគរបាលបន្តទៀតថា រថយន្តបង្កម៉ាក ពុយសូ ពណ៌ស ពាក់ស្លាកលេខស្វាយរៀង 3A-0845 បើកបរដោយឈ្មោះ ចន តារ៉ា អាយុ៤០ឆ្នាំ បង្កគ្រោះថ្នាក់ដោយខ្លួនឯង រស់នៅភូមិសំរោងបាក់ ឃុំមហាសាំងស្រុកភ្នំស្រួច ខេត្តកំពង់ស្ពឺ។

មុនជួបគ្រោះថ្នាក់ គឺបុរសរងគ្រោះបានបើកបរល្បឿនលឿនរេចង្កូតក្រឡាប់លើទ្រូងផ្លូវទិសដៅពីភ្នំពេញទៅក្រុងខេមរភូមិន្ទ ទីរួមខេត្តកោះកុង ដឹកអីវ៉ាន់ចាប់ហួយ និងគ្រឿងសំណង។

ក្រោយមានអ្នកជួយសង្គ្រោះបឋម បុរសរងគ្រោះត្រូវបានអាជ្ញាធរ សមត្ថកិច្ច ទាក់ទងហៅរថយន្តសង្គ្រោះដឹកទៅព្យាបាលមន្ទីរពេទ្យបង្អែកខេត្តកោះកុង។

គួរជម្រាបថា គ្រោះថ្នាក់ចរាចរណ៍តាមផ្លូវលេខជាតិ៤៨ចាប់ពីភូមិសាស្ត្រស្រុកស្រែអំបិលរហូតមកដល់ក្រុងខេមរភូមិន្ទ ភាគច្រើនបង្កឡើងដោយម្ចាស់រថយន្តបើកបរខ្វះការប្រុងប្រយ័ត្ន ដោយបើកបរហួសលឿនកំណត់ ដឹកទំនិញលើសទម្ងន់ និងការវ៉ាជែងគ្នាក្នុងស្ថានភាពផ្លូវកោងចុះចំណោតជាដើម៕

អត្ថបទ ៖ សិរីវឌ្ឍនៈ