ជនជាតិចិនបេីករថយន្តបុកម៉ូតូអូសជាច្រេីនគីឡូបណ្តាល ឱ្យនារីម្នាក់ស្លាប់និងម្នាក់ទៀត រងរបួសធ្ងន់

នារីម្នាក់ស្លាប់នឹងម្នាក់ទៀតរងបានរបួសធ្ងន់ ត្រូវបានរថយន្តសាមុយដឹកទៅសង្គ្រោះបន្ទាន់នៅឯមន្ទីរពេទ្យភ្លាមៗ​ខណៈជិះម៉ូតូឌុបគ្នាត្រូវជនជាតិចិនបើករថយន្តបុកនៅចំណុចផ្លូវបំបែកជាបួននិងអូសជាច្រើនគីឡូម៉ែត្រ។

ហេតុការណ៍នេះបានកើតឡើងនៅម៉ោង១២នឹង១០នាទីរំលងអធ្រាត្រឈានចូលថ្ងៃទី៣០ ខែឧសភា ឆ្នាំ២០២១ តាមបណ្ដោយផ្លូវលេខ៣៦០ កែងនឹងផ្លូវលេខ១០៥ ស្ថិតក្នុងសង្កាត់បឹងកេងកងទី៣ ខណ្ឌបឹងកេងកង រាជធានីភ្នំពេញ និងអូសដល់ចំណុចមុខសាលាហ៊ុននាង តាមបណ្តោយផ្លូវលេខ៤៨៨ ក្នុងសង្កាត់ផ្សារដេីមថ្កូវ ខណ្ឌចំការមន។

សពនាងរងគ្រោះឈ្មោះ ស្រីនីត អាយុជាង២០ ចំណែកអ្នករងរបួសមិនទាន់ស្គាល់អត្ដសញ្ញាណនៅឡើយ។

ប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថា នៅមុនពេលហេតុការណ៍គេបានឃើញជនជាតិចិនបើករថយន្តម៉ាក MG ពណ៌ខ្មៅ ធ្វើដំណើរតាមបណ្ដោយផ្លូវលេខ៣៦០ ខណៈពេលមកដល់ត្រង់ចំណុចផ្លូវបំបែកជាបួនក៏បានជ្រុលទៅបុកជាមួយនឹងម៉ូតូរបស់ជនរងគ្រោះ កំពុងជិះឌុបគ្នាពេញទំហឹងបណ្ដាលឲ្យម៉ូតូនឹងនារីម្នាក់គៀបជាប់នឹងកាងរថយន្តអូសរហូតមកដល់ ទល់មុខនឹងសាលាហ៊ុននាង បឹងត្របែក ទើបរបូតចេញពីកាងរថយន្តបណ្ដាលឱ្យនារីម្នាក់ស្លាប់ ចំណែករថយន្តបង្កព្យាយាមបើករត់តែត្រូវបាន ប្រជាពលរដ្ឋដេញចាប់បាន និងវាយម្ចាស់រថយន្តទ្រោមខ្លួនទើបប្រគល់ទៅឲ្យសមត្ថកិច្ច។

បន្ទាប់ពីកើតហេតុសមត្ថកិច្ចមូលដ្ឋានក៏បានចុះទៅដល់បានទាក់ទងទៅសមត្ថកិច្ចផ្នែកជំនាញចរាចរណ៍ផ្លូវគោករាជធានីភ្នំពេញ យករថយន្ត និងម៉ូតូរបស់ជនរងគ្រោះទៅរក្សាទុករង់ចាំដោះស្រាយគ្នាទៅតាមនិតិវិធីច្បាប់។ចំណែកសពជនរងគ្រោះបានធ្វើកំណត់ហេតុរួចរាល់ក៏បានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕ អត្ថបទ៖ សុខា