បើករថយន្តលឿនរេចង្កូតបុក​សួនច្បារពុះចែកទ្រូងផ្លូវ រួចបន្ត​បុកបង្គោលភ្លើងបណ្តាល​ឱ្យ​ដួលរលំ

បុរសម្នាក់បើករថយន្តស៊េរីទំនើបក្នុងល្បើនលឿន ហើយបានរេចង្កូតទៅបុកសួនច្បារពុះចែកទ្រូងផ្លូវ ហើយរថយន្តនៅមិនទាន់អស់ល្បឿនក៏បន្តទៅបុកនឹងបង្គោលភ្លើងបំភ្លឺផ្លូវបណ្តាលឲ្យរលំអស់មួយដើមរងការខូចខាតយ៉ាងដំណំ ខណៈមិនមានមនុស្សរងរបួស។

ហេតុការណ៍នេះ បានកើតឡើង បង្កការភ្ញាក់ផ្អើលនៅវេលាម៉ោង៨ និង២០នាទីយប់ថ្ងៃទី៦ ខែមិថុនា ឆ្នាំ២០២១ ដែលស្ថិតនៅតាមបណ្ដោយផ្លូវ៦A ក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ។

ប្រភពព័ត៍មានពីកន្លែងកើតហេតុ បានឱ្យដឹងថាមុនពេលកើតហេតុគេបានឃើញរថយន្តស៊េរីទំនើបមួយគ្រឿងម៉ាក​ឡិច​សុីស GS300ពណ៌ ស បើកបរដោយបុរសម្នាក់ធ្វេីដំណេីរក្នុងទិសដៅពីត្បូងទៅជើងក្នុងល្បឿនលឿន លុះមកដល់ត្រង់ចំណុចកើតហេតុស្រាប់តែរេចង្កូតមកឆ្វេងដៃបុកនឹងសួនច្បារពុះចែកទ្រូងផ្លូវពេញទំហឹង ហើយរថយន្តមិនទាន់អស់ល្បឿនបានបន្តទៅបុកនឹងបង្គោលភ្លើងបំភ្លឺបណ្ដាលឱ្យរលំបង្គោលភ្លើងអស់មួយដើមទៀត រថយន្តរងការខូចខាតផ្នែកខាងមុខចំហៀងខាងឆ្វេងយ៉ាងដំណំ ចំណែកឯម្ចាស់រថយន្តបានចុះគេចខ្លួនពីកន្លែងកើតហេតុបាត់ស្រមោល។

ក្រោយកើតហេតុសមត្ថកិច្ចមូលដ្ឋានបានមកដល់រួចបានទំនាក់ទំនងទៅសមត្ថកិច្ចជំនាញចរាចរណ៍នៃស្នងការនគរ​បាល​រាជធានីភ្នំពេញចុះមកធ្វើការវាស់វែងយករថយន្តបង្កទៅរក្សាទុកនៅស្នងការដ្ឋាននគរបាលរាជធានីភ្នំពេញរង់ចាំធ្វើការដោះស្រាយគ្នានៅពេលក្រោយតាមផ្លូវច្បាប់៕ អត្ថបទ៖ សុខា