ចរាចរណ៍

លោតទម្លាក់ខ្លួនពីលើស្ពានអាកាស៥មករា ហើយត្រូវរថយន្តកិនបន្ថែម តែមិនស្លាប់

បានផុស

៤ years មុន

នៅ

ថ្ងៃសុក្រ ២៥ មិថុនា ២០២១

ដោយ

ភ្នំពេញ ៖ បុរសម្នាក់ ត្រូវបានគេជួយសង្គ្រោះដោយដឹកបញ្ជូនទៅកាន់មន្ទីរពេទ្យភ្លាមៗ ក្រោយពីបុរសម្នាក់នេះ ទំនងជាបែកថ្នាំ បានដើរឡើងលើស្ពានអាកាស៥មករា ហើយបានលោតទម្លាក់ខ្លួនមកខាងក្រោមស្ពានបណ្តាលឲ្យរបួសធ្ងន់ ហើយត្រូវរថយន្តឡង់គ្រីស័របើកមកកិនចំជើងបន្ថែមទៀតនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះ បានបង្កើតឲ្យមានការភ្ញាក់ផ្អើលឡើងកាលពីវេលាថ្ងៃត្រង់ ថ្ងៃទី២៥ មិថុនា ២០២១នៅចំណុចក្រោមស្ពានអាកាស៥មករា ផ្លូវគីមអ៊ីលស៊ុងកែងនិងផ្លូវសហព័ន្ធរុស្ស៊ី ស្ថិតក្នុងសង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ។

បុរសខាងលើជាជនអនាថា មិនត្រូវបានគេស្គាល់អត្តសញ្ញាណនោះទេ មានអាយុប្រហែលជាង៤០ឆ្នាំ ស្លៀកខោជើងខ្លីពណ៌ទឹកប៊ិច អាវយឺតដៃខ្លីពណ៌ស្លែ។

សាក្សីនៅកន្លែងកើតហេតុ បានដឹងថា នៅមុនពេលកើយហេតុ គេឃើញបុរសអនាថា ខាងលើដើរឡើងស្ពានអាកាស៥មករា តែពុំមាននរណាចាប់អារម្មណ៍ថា បុរសនោះលោតសម្លាប់ខ្លួននោះទេ ។ លុះមួយសន្ទុះក្រោយមកស្រាប់តែបុរសអនាថារូបនេះលោតចុះមកក្រោម បណ្តាលឲ្យរបួសធ្ងន់ធ្ងរតែម្តង ភ្លាមនោះ សមត្ថកិច្ចដែលប្រចាំការគោលដៅខាងលើ បានជួយអន្តរាគមន៍ ដោយហៅរថយន្តសាមុយមកដឹកទៅសង្គ្រោះ។ ហើយខណៈកំពុងរង់ចាំរថយន្តសាមុយមកដឹក ក៏ស្រាប់តែមានរថយន្តឡង់គ្រីស័រ ពណ៌សមួយគ្រឿង ពាក់ស្លាកលេខភ្នំពេញBD-7883 បើកបរដោយបុរសម្នាក់តាមក្រោយស្ពានអាកាស៥មករា ក្នុងទិសដៅពីកើតទៅលិច បត់តាមក្រោមស្ពានអាកាស៥មករាមកផ្លូវ២៨៩ ក៏កិនចំជើងបុរសអនាថានោះបន្ថែមទៀត។

ក្រោយកើតហេតុបុរសអនាថាខាងលើ ត្រូវបានរថយន្តដឹកទៅសង្គ្រោះមន្ទីរពេទ្យព្រះកុសុមៈប៉ុន្តែខាងមន្ទីរពេទ្យមិនទទួលថា គ្មានកន្លែងស្នាក់ ទើបដឹកទៅបន្តសង្គ្រោះនៅមន្ទីរពេទ្យឯកជន។ ចំណែករថយន្តត្រូវបានសមត្ថកិច្ចបណ្តោះអាសន្នរង់ចាំចំណាត់ការនៅពេលក្រោយ៕

ដោយ ៖ ស្រីរ័ត្ន