បុរសម្នាក់ ត្រូវរថយន្តបុកស្លាប់ លើកំណាត់ផ្លូវថៃហ្គឺរ៍ ក្នុងសង្កាត់ព្រែកថ្មី ខណ្ឌច្បារអំពៅ

បុរសម្នាក់ មានវ័យប្រមាណ៣០ឆ្នាំ ត្រូវបានរថយន្តមិនស្គាល់អត្តសញ្ញាណបុក បណ្ដាលឲ្យស្លាប់នៅលើកំណាត់ផ្លូវថៃហ្គឺរ៍ (ផ្លូវជាតិលេខ២) ស្ថិតក្នុងភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។

លោកវរសេនីយ៍ទោ ឯក សារ៉ន អធិការរងនគរបាលខណ្ឌច្បារអំពៅ ទទួលបន្ទុកសណ្តាប់ធ្នាប់ បានឲ្យកម្ពុជាថ្មីដឹងថា ករណីគ្រោះថ្នាក់ចរាចរណ៍នេះ បានកើតឡើងនៅវេលាម៉ោងប្រមាណ ៣និង៣០នាទី ទាបភ្លឺ ថ្ងៃទី១០ ខែកក្កដា ឆ្នាំ២០២១។

លោកថា នៅមុនពេលកើតហេតុ បុរសដែលរងគ្រោះដល់ស្លាប់នេះ បានដើរដោយថ្មើជើង តាមបណ្តោយថៃហ្គឺរ៍ ក្នុងទិសដៅពីកើតទៅលិច។ លុះមកដល់មយខផ្ទះលេខ៣៨៨ ភូមិចំពុះក្អែក ក៏ស្រាប់តែមានរថយន្ត មិនស្គាល់ម៉ាកមកបុកពីក្រោយ បណ្តាលឲ្យស្លាប់ នៅនឹងកន្លែងតែម្ដង។ ចំណែករថយន្តបង្ក បានបើកបង្ហួសគេចពីកន្លែងកើតហេតុ​បាត់ស្រមោល។

មកដល់ព្រឹកថ្ងៃដដែល នគរបាលបានដឹកសពបុរសខាងលើនេះ យកទៅតំកល់នៅវត្តទឹកថ្លា ដើម្បីស្រាវជ្រាវរកអត្តសញ្ញាណសព ព្រមទាំងគ្រួសារជនរងគ្រោះ យកទៅធ្វើបុណ្យតាមប្រពៃណី។ ដោយឡែកប្រជាពលរដ្ឋ ក្នុងភូមិចំពុះក្អែក បានអះអាងថា ពួកគាត់ពុំដែលស្គាល់បុរស ដែលស្លាប់ខាងលើនេះឡើយ៕ (ដោយ)៖ នរា