សង្ស័យម្ចាស់ស្រវឹង បើករថយន្តកូរ៉ូឡាបើកបុកទ្រូងផ្លូវ បណ្ដាលឲ្យបាក់អស់មួយកង់

រថយន្តកូរ៉ូឡាមួយគ្រឿង បើកក្នុងល្បឿនលឿន ជ្រុលទៅបុករបាំងថ្មពុះចែកទ្រូងផ្លូវ បណ្ដាលឲ្យបាក់មួយកង់ខ្ទាតចេញពីជួរ និងធ្វើឲ្យរថយន្តរងការខូចខាត។ ហេតុការណ៍នេះ បានកើតឡើងកាលពីវេលាម៉ោង១១ និង៣០នាទីយប់ថ្ងៃទី១៨ ខែកក្កដា ឆ្នាំ២០២១ ត្រង់ចំណុចមុខរោងចក្របារីសេក តាមបណ្ដោយផ្លូវជាតិលេខ២ ក្នុងសង្កាត់ចាក់អង្រែលើខណ្ឌមានជ័យ រាជធានីភ្នំពេញ។

យោងតាមប្រភពព័ត៌មាន ពីកន្លែងកើតហេតុបានឲ្យដឹងថា មុនកើតហេតុគេឃើញរថយន្តកូរ៉ូឡា ពណ៌ស្ករមួយគ្រឿង ពាក់ស្លាកលេខភ្នំពេញ2S-0821 ធ្វើដំណើរតាមបណ្ដោយផ្លូវជាតិលេខ២ ទិសដៅពីត្បូងទៅជើង ខណ:មកដល់ចំណុចកើតហេតុខាងលើ សង្ស័យតែម្ចាស់ស្រវឹង បានរេចង្កូតមកឆ្វេងដៃជ្រុលទៅបុករបាំងថ្ម នៃក្បាលព្រួញពុះចែកទ្រូងផ្លូវ បណ្ដាលឲ្យបាក់អស់មួយកង់ខ្ទាតចេញពីជួរ ឯរថយន្តរងការខូចខាតផ្នែកខាងមុខខាងឆ្វេង។ ភ្លាមនោះតៃកុងរថយន្តបង្ក បានបើកទ្វារចេញពីរថយន្តគេចខ្លួនបាត់។

ក្រោយកើតហេតុ សមត្ថកិច្ចមូលដ្ឋានបានចុះមកដល់ និងទំនាក់ទំនងទៅសមត្ថកិច្ចជំនាញ ចុះមកធ្វើការវាស់វែងយករថយន្តបង្កទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំធ្វើការដោះស្រាយគ្នាតាមច្បាប់៕ (ដោយ៖  សុខា