ចរាចរណ៍

រថយន្តកូរ៉េបុកះ រថយន្ត២គ្រឿងរងការខូចខាត សំណាងមិនមានមនុស្សរងរបួស

បានផុស

៣ years មុន

នៅ

ថ្ងៃពុធ ២៩ កញ្ញា ២០២១

ដោយ

បុរសម្នាក់បើកបររថយន្តកូរ៉េមួយគ្រឿង ក្នុងល្បឿនលឿនទាំងរថយន្តដាច់ហ្វ្រ័ង ក៏ជ្រុលបុករថយន្តម៉ាកព្រូសមួយគ្រឿង បើកឆ្លងផ្លូវបណ្តាលឱ្យរងការខូចខាត ហើយរថយន្តបង្កនៅមិនទាន់អស់ល្បឿន ក៏បន្តទៅបុករថយន្តម៉ាកCRVមួយគ្រឿងទៀត សំណាងមិនមានមនុស្សរងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ នេះបានកើតឡើងកាលពីវេលាម៉ោង១រសៀល ថ្ងៃទី២៩ ខែកញ្ញា ឆ្នាំ២០២១ នៅចំណុចមុខអាកាសយាន្តដ្ឋានអន្តរជាតិភ្នំពេញ តាមបណ្តោយមហាវិថីសហព័ន្ធរុស្ស៊ី ក្នុងភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេបានឃើញរថយន្តម៉ាកព្រូស ពណ៌ប្រផេះពាក់ស្លាកលេខភ្នំពេញ 2AZ 7349 បើកបរដោយបុរសម្នាក់ធ្វើដំណើរតាមចេញពីផ្លូវលំឆ្លងមហាវិថីសហព័ន្ធរុស្ស៊ី ខណៈឆ្លងជិតផុតទៅហើយស្រាប់តែមានរថយន្តកូរ៉េពណ៌ស ពាក់ស្លាកលេខភ្នំពេញ2AH 4430 ធ្វើដំណើរតាមបណ្តោយមហាវិថីសហព័ន្ធរុស្ស៊ី ក្នុងទិសដៅពីកើតទៅលិចក្នុងល្បឿនលឿន ក៏ជ្រុលបុកគូទរថយន្តព្រូសផ្នែកខាងឆ្វេងពេញទំហឹងតែម្តង បណ្តាលឱ្យរងការខូចខាត ភ្លាមនោះរថយន្តបង្កនៅមិនទាន់អស់ល្បឿន ក៏បន្តទៅបុករថយន្តម៉ាកCRV ពណ៌ខ្មៅពាក់ស្លាកលេខភ្នំពេញ2AF 0335 ចំពីចំហៀងពេញទំហឹងបណ្តាលឱ្យបែកកង់ក្រោយផ្នែកខាងឆ្វេងរងការខូចខាតយ៉ាងដំណំ សំណាងមិនមានមនុស្សរងរបួស។

បើតាមការបញ្ជាក់ពីម្ចាស់រថយន្តបង្កវិញបានឱ្យដឹងថា ដោយសារតែរថយន្តរបស់គាត់ដាច់ហ្វ្រ័ងចាប់មិនជាប់ទើបបង្កគ្រោះថ្នាក់បែបនេះ។ ក្រោយកើតហេតុ សមត្ថកិច្ចបានចុះធ្វើការសម្របសម្រួល តែដោយសារមិនត្រូវគ្នាទើបប្រគល់ឱ្យជំនាញចុះមកធ្វើការវាស់វែងយកទៅរក្សាទុក នៅអធិការដ្ឋាននគរបាលខណ្ឌពោធិ៍សែនជ័យ ដើម្បីរង់ចាំដោះស្រាយពេលក្រោយ៕

អត្ថបទ៖ សុខា

Related Topics:គ្រោះថ្នាក់ចរាចរណ៍