វិស្វករម្នាក់ ត្រូវរថយន្តហ៊ីយ៉ាន់ ដាយបុកម៉ូតូ និងកិនបណ្ដាលឲ្យស្លាប់ភ្លាមៗ នៅកន្លែងកើតហេតុ

បុរសម្នាក់បានស្លាប់ភ្លាមៗ ខណៈកំពុងជិះម៉ូតូ ហើយត្រូវរថយន្តហ៊ីយ៉ាន់ដាយ បើកបុកពីក្រោយ និងកិនអូសបង្កការភ្ញាក់ផ្អើល កាលពីវេលាម៉ោង ១១និង ២០នាទីយប់ ថ្ងៃទី ៨ ខែវិច្ឆិកា ឆ្នាំ ២០២១ នៅចំណុចស្ពានដែកចំការដូង តាមបណ្តោយផ្លូវលេខ ២១៧ ក្នុងសង្កាត់ដង្កោ ខណ្ឌដង្កោ រាជធានីភ្នំពេញ។

សពជនរងគ្រោះ មានឈ្មោះ ហៃ គីណូ អាយុជាង ៤០ឆ្នាំ មុខរបរវិស្វករ ស្នាក់នៅបុរីពិភពថ្មីចំការដូង ខណ្ឌដង្កោ។ អ្នកបើកបររថយន្ត មានឈ្មោះ ថា គៀរ ភេទប្រុស អាយុ ៣០ឆ្នាំ មុខរបរបើករថយន្ត។

តាមប្រភពព័ត៌មាន ពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរសម្នាក់ ជិះម៉ូតូម៉ាកស្កូបពី ពណ៌ស ពាក់ស្លាកលេខភ្នំពេញ 1HV 3218 ធ្វើដំណើរតាមបណ្តោយផ្លូវលេខ ៣៧១ ក្នុងទិសដៅពីកើតទៅលិច។ ខណៈមកដល់ចំណុចកើតហេតុ ក៏បត់ឆ្វេងទៅត្បូងតាមផ្លូវលេខ ២១៧ ភ្លាមនោះស្រាប់តែមានរថយន្តម៉ាកហ៊ីយ៉ាន់ដាយ ពណ៌សឆ្នូតក្រហម ពាក់ស្លាកភ្នំពេញ 3D 8306 ធ្វើដំណើរតាមបណ្តោយផ្លូវលេខ ២១៧ ក្នុងទិសដៅពីជើងទៅត្បូង ក៏ជ្រុលបុកម៉ូតូពីក្រោយ បណ្តាលឲ្យម្ចាស់ម៉ូតូ ដួលចូលក្រោមរថយន្តកិនស្លាប់ភ្លាមៗ នៅកន្លែងកើតហេតុ។ ចំណែករថយន្ត បានព្យាយាមបើកគេចខ្លួន បានប្រហែល ៤០ម៉ែត្រ ក៏ឈប់រថយន្តចុះរត់គេចខ្លួន តែត្រូវប្រជាពលរដ្ឋ ដេញចាប់បានភ្លាមៗ។

ក្រោយកើតហេតុសមត្ថកិច្ចមូលដ្ឋាន បានចុះទៅដល់ចំណុចកើតហេតុ និងទំនាក់ទំនងទៅជំនាញការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ មកធ្វើការវាស់វែងយករថយន្ត និងម៉ូតូរួមទាំងតៃកុងរថយន្ត ទៅរក្សាទុករកចាំដោះស្រាយតាមច្បាប់។ ចំណែកសពជនរងគ្រោះ ត្រូវបានប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី៕

អត្ថបទ ៖សុខា