គ្រោះថ្នាក់ចរាចរណ៍រវាងរថយន្ត និងរថយន្តត្រង់ចំណុចផ្លូវបំបែកជាបួន បណ្ដាលឲ្យរងការខូចខាតយ៉ាងដំណំ

បុរសជនជាតិចិនម្នាក់ បើករថយន្តហ៊ីយ៉ាន់ដាយស្តារិចមួយគ្រឿង ទៅបុករថយន្ត Fort Ranger ពីចំហៀងត្រង់ចំណុចផ្លូវបំបែកជាបួន បណ្ដាលឲ្យរងការខូចខាតយ៉ាងដំណំ កាលពីវេលាម៉ោង ១០ និង៣០នាទីយប់ថ្ងៃទី ៨ ខែវិច្ឆិកា ឆ្នាំ ២០២១ នៅចំណុចផ្លូវលេខ ១២២ កែងនឹងផ្លូវលេខ ២២១ ក្នុងសង្កាត់ផ្សារដេប៉ូទី ៣ ខណ្ឌទួលគោក រាជធានីភ្នំពេញ។

តាមប្រភពព័ត៌មាន ពីកន្លែងកើតហេតុ បានឲ្យដឹងថា មុនកើតហេតុ គេឃើញបុរសជនជាតិចិនម្នាក់ បើករថយន្ដហ៊ីយ៉ាន់ ដាយស្តារិចមួយគ្រឿង ពណ៌ទឹកប្រាក់ ពាក់ស្លាកលេខភ្នំពេញ 2AV-1471 ធ្វើដំណើរតាមបណ្តោយផ្លូវ ១២២ទិសដៅពីកើតទៅលិច ក្នុងល្បឿនលឿន។

លុះមកដល់ ចំណុចកើតហេតុខាងលើ បានជ្រុលទៅបុករថយន្ត Ford Ranger មួយគ្រឿង ពណ៌ស ពាក់ស្លាកលេខភ្នំពេញ 2AY-0866 ធ្វើដំណើរតាមបណ្តោយផ្លូវ ២២១ ទិសដៅពីត្បូងទៅជើង ចំពីចំហៀងរថយន្តខាងស្ដាំពេញទំហឹង បណ្ដាលឲ្យរងការខូចខាតយ៉ាងដំណំ។

ចំណែករថយន្តបង្ក មិនបានឈប់ដោះស្រាយនោះទេ ហើយបានជ្រុះស្លាកលេខរថយន្តខាងមុខ នៅនឹងកន្លែងកើតហេតុ និងបានព្យាយាមបើករត់ យកមកផ្លុងចោលនៅចំណតរថយន្តមួយកន្លែង មុខខារ៉ាអូខេទន្លេសេកុងថ្មី ចម្ងាយពីកន្លែងកើតហេតុប្រមាណជិត ២០០ម៉ែត្រ។

ក្រោយកើតហេតុ សមត្ថកិច្ចមូលដ្ឋាន បានទំនាក់ទំនងទៅសមត្ថកិច្ចជំនាញ ចុះមកធ្វើការវាស់វែង យករថយន្តទាំងពីរគ្រឿងទៅរក្សាទុក រង់ចាំម្ចាស់រថយន្តបង្ក ចូលខ្លួនមកធ្វើការដោះស្រាយគ្នា តាមផ្លូវច្បាប់៕

អត្ថបទ៖ សុខា