ចរាចរណ៍

បើករថយន្តបំពានភ្លើងស្តុបបុករថយន្តមួយគ្រឿងទៀត ធ្លាក់មនុស្សចេញពីមកក្រៅរបួសពីរនាក់

បានផុស

៣ years មុន

នៅ

ថ្ងៃចន្ទ ១៣ ធ្នូ ២០២១

ដោយ

រថយន្តកូរ៉េមួយគ្រឿងបើកបរដោយបុរសម្នាក់រួមដំណើរដោយបុរស៣នាក់ទៀតបំពានភ្លើងស្តុបក្នុងល្បឿនលឿនជ្រុលទៅបុកជាមួយរថយន្តធុនត្រា ពីចំហៀងទំហឹងបណ្ដាលឲ្យមនុស្សដែលជិះនៅក្នុងរថយន្តកូរ៉េពីរនាក់ហោះផ្លោងចេញពីក្នុងរថយន្តធ្លាក់រណូករណែលពេញផ្លូវ សន្លប់មួយសន្ទុះធំទើបដឹងខ្លួនវិញ។

ហេតុការណ៍នេះកើតឡើងកាលពីវេលាម៉ោង១២និង១០នាទីយប់រំលងអាធ្រាត្រឈានចូលថ្ងៃទី១៣ ខែធ្នូ ឆ្នាំ២០២១ នៅចំណុចក្រោមស្ពានអាកាសផ្សារដីហុយ តាមបណ្តោយផ្លូវសហព័ន្ធរុស្ស៊ី កែងនិងផ្លូវ ណតប្រ៊ីត ស្ថិតក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញរថយន្តកូរ៉េមួយគ្រឿងពណ៌សពាក់ស្លាកលេខ2AI-0960បើកបរដោយបុរសម្នាក់រួមដំណើរនឹងបុរស៣នាក់ទៀត ធ្វើដំណើរតាមបណ្ដោយផ្លូវភ្នំពេញហាណូយ ទិសដៅពីជើងទៅត្បូង ឆ្ពោះឆ្លងមកផ្លូវណតប្រ៊ីត ក្នុងល្បឿនលឿននិងបំពានភ្លើងស្តុប លុះមកដល់ចំណុចកើតហេតុខាងលើបានបុកជាមួយរថយន្តធុនត្រាពណ៌សពាក់ស្លាកលេខភ្នំពេញ2BL-7923បើកដោយបុរសម្នាក់ធ្វើដំណើរតាមបណ្តោយផ្លូវសហព័ន្ធរុស្ស៊ីទិសដៅពីលិចទៅកើតចំពីចំហៀងខាងមុខខាងស្ដាំរថយន្តធុនត្រាពេញទំហឹងបណ្តាលឲ្យរថយន្តទាំងពីរគ្រឿងវិលមួយជុំនិងបុរសពីរនាក់ជិះនៅក្នុងរថយន្តកូរ៉េ ហោះផ្លោងចេញពីរថយន្តធ្លាក់បោកនិងថ្នល់ររងរបួសសន្លប់មួយសន្ទុះធំទើបដឹងខ្លួនវិញ ចំណែករថយន្តទាំងពីរគ្រឿងរងការខូចខាតយ៉ាងដំណំដូចគ្នា។

ក្រោយកើតហេតុសមត្ថកិច្ចមូលដ្ឋានដែលប្រចាំការនៅក្រោមស្ពានអាកាសផ្សារដីហុយបានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តទាំងពីគ្រឿងទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរងចាំធ្វើការដោះស្រាយគ្នាតាមផ្លូវច្បាប់៕

អត្ថបទ៖ សុខា