ចរាចរណ៍

រថយន្តរេចង្កូត ក្រឡាប់សង្កត់លើអ្នកបើកម៉ូតូ ២ នាក់ ស្លាប់នៅនឹងកន្លែង

បានផុស

៣ years មុន

នៅ

ថ្ងៃអង្គារ ១ កុម្ភៈ ២០២២

ដោយ

មនុស្ស ១ នាក់ស្លាប់ និងមួយចំនួនទៀតរងរបួស បន្ទាប់ពីមានរថយន្តមួយគ្រឿង បានបោះពួយយ៉ាងលឿន ហើយបានរេចង្កូតក្រឡាប់កណ្តាលផ្លូវ និងបានប៉ះទៅលើភាគីម៉ូតូដែលកំពុងបើកបរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការអះអាងពីលោក សេង លុច អធិការនគរបាលស្រុកថ្មគោល បានបញ្ជាក់ថា ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ៦ និង ១០ នាទី ព្រលប់ កាលពីថ្ងៃទី ៣១ ខែមករា ឆ្នាំ ២០២២ លើកំណាត់ផ្លូវជាតិលេខ ៥៧B ត្រង់ចំណុចក្រុមទី ៣៣ ស្ថិតក្នុងភូមិប្រគាប ឃុំរូងជ្រៃ ស្រុកថ្មគោល ខេត្តបាត់ដំបង ។

លោកអធិការបានបន្តថា ករណីគ្រោះថ្នាក់ចរាចរណ៍មួយនេះ បានកើតឡើង រវាងម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ពាក់ស្លាកលេខ បាត់ដំបង1AE-7678 បើកបរដោយឈ្មោះ ធឿន ប៊ុនយ៉ាន ភេទប្រុស អាយុ ២០ ឆ្នាំ មានទីលំនៅភូមិបល្ល័ង្គលើ ឃុំខ្នាចរមាស ស្រុកបវេល និងអ្នករួមដំណើរ ឈ្មោះ បិត ចិន្តា ភេទ ប្រុស អាយុ១៩ឆ្នាំ មានទីលំនៅភូមិព្រៃសង្ហា ឃុំខ្នាចរមាស ស្រុកបវេល។ ដោយឡែករថយន្តធុនតូចម៉ាកនីសាន់ ពណ៌ស ស៊េរី ២០០៦ ពាក់ស្លាកលេខ បាត់ដំបង 2C-1446 បើកបរដោយឈ្មោះ ខិត សុភ័ណ្ឌ ភេទប្រុស អាយុ៣៧ឆ្នាំ មានទីលំនៅភូមិជំនីក ឃុំអន្លង់វិល ស្រុកសង្កែ ដោយមានអ្នករួមដំណើរ២នាក់ ។

បើតាមការបញ្ជាក់ពីសមត្ថកិច្ចជំនាញ បានលើកឡើងថា ហេតុការណ៍ខាងលើ គឺបណ្តាលមកពីរថយន្តដែលកំពុងបោះពួយយ៉ាងលឿនក្នុងទិសដៅពីលិចទៅកើត បានរេចង្កូតធ្វើឲ្យរថយន្តក្រឡាប់កណ្តាលផ្លូវ សង្កត់ទៅលើម៉ូតូដែលកំពុងបើកបរច្រាស់ទិសគ្នា ធ្វើឲ្យភាគីអ្នកបើកបរម៉ូតូ និងអ្នករួមដំណើរស្លាប់នៅនិងកន្លែងទាំងពីរនាក់តែម្តង រីឯមនុស្សនៅក្នុងរថយន្តក៏មានអ្នករងរបួសជាច្រើននាក់ផងដែរ ចំណែកអ្នកបើកបររថយន្តបានរត់គេចខ្លួនបាត់ស្រមោល។

បច្ចុប្បន្នក្រោយពេលកើតហេតុ សមត្ថកិច្ចបានបញ្ជូនមធ្យោបាយធ្វើដំណើរទាំងពីរទៅកាន់ការិយាល័យចរាចរណ៍ផ្លូវគោកហើយ និងសពក៏បានប្រគល់ទៅឲ្យក្រុមគ្រួសារដើម្បីនាំយកទៅធ្វើបុណ្យតាមប្រពៃណី ។ ដោយពេលនេះដែរកម្លាំងជំនាញកំពុងស្រាវជ្រាវរកអ្នកបើកបររថយន្តដើម្បីឲ្យចូលខ្លួនមកដោះស្រាយតាមផ្លូវច្បាប់ ៕

អត្ថបទ៖ សោ និយមរ័ត្ន