សត្វក្របីរត់បុកម៉ូតូមួយគ្រឿង របួសធ្ងន់ស្រាលមនុស្ស៣នាក់

ក្មេងៗចំនួន៣នាក់ ក្នុងនោះមានក្មេងស្រីជំទង់ដែលជាអ្នកបើកបរម៉ូតូបានដួលសន្លប់ ក្រោយពីក្របីឈ្មោលដ៏ធំមួយក្បាល រត់ទៅជល់បុកពេញទំហឹង ពេលកំពុងធ្វើដំណើរកាត់តាមរង្វង់មូល ក្រុងបានលុង កាលពីវេលាម៉ោង៨និង៤០នាទីព្រឹក ថ្ងៃទី១៨ ខែមេសា ឆ្នាំ២០២២។

លោក ហួត បូរី អធិការនគរបាលក្រុងបានលុង បានឲ្យកម្ពុជាថ្មី ដឹងតាមទូរស័ព្ទថា ក្របីឈ្មោលមួយក្បាលបានរត់តាមផ្លូវកាត់រង្វង់មូល ហើយបានជល់បុកម៉ូតូក្មេងឌុបគ្នា៣នាក់ បណ្ដាលឲ្យដួលនៅរង្វង់​មូលក្រុងបានលុង។ ក្មេងៗចំនួន៣នាក់ក្នុងនោះ មានក្មេងប្រុសម្នាក់ និងក្មេងស្រីជំទង់២នាក់ បានរងរបួស ទទួលរងការភ័យកំពុងសម្រាកព្យាបាលនៅមន្ទីរពេទ្យបង្អែកខេត្តរតនគិរី។

លោកអធិការបានបញ្ជាក់ទៀតថា ហេតុការណ៍ខាងលើនេះ ដោយសារតែម្ចាស់ក្របីបាននាំយកក្របីមកពីជនបទពុំធ្លាប់ចងខ្សែមកលក់នៅក្រុងបានលុង។ ក្របីចំនួន២ក្បាលបានដាច់ខ្សែហើយរត់មកតាមផ្លូវ កាត់ហ្វូងមនុស្សទើបបង្កជាគ្រោះថ្នាក់បែបនេះ។

ក្រោយហេតុការណ៍សមត្ថកិច្ចដេញចាប់ក្របីដែលបង្កគ្រោះថ្នាក់ដល់មនុស្សបានចំនួន២ក្បាល និងប្រគល់ទៅឲ្យម្ចាស់វិញ។ ករណីនេះម្ចាស់ក្របីត្រូវតែទទួលខុសត្រូវដោះស្រាយ​ថវិកាជាមួយក្រុមគ្រួសារ​ជនរងគ្រោះ​ដែលកំពុងសម្រាកព្យាបាលនៅមន្ទីរពេទ្យបង្អែកខេត្ត៕

អត្ថបទ៖ វុទ្ធឦសាន